Dahi bəstəkarın doğum
günü ev-muzeyində də qeyd olundu
Dahi bəstəkar, professional musiqimizin banisi Üzeyir
Hacıbəylinin anadan olmasının 126-cı
ildönümü və 18 sentyabr - Milli Musiqi Günü
münasibətilə təşkil olunan tədbirlərdən
biri də sənətkarın ev-muzeyində gerçəkləşdi.
Tədbiri muzeyin direktoru, Əməkdar
incəsənət xadimi Sərdar Fərəcov açaraq
böyük bəstəkarın doğum gününün əsl
musiqi təntənəsi kimi qeyd olunmasından
danışdı: «Bu bayram ildən-ilə genişlənir. Azərbaycan
xalqının tarixində, mədəniyyətində silinməz
iz qoymuş Üzeyir Hacıbəylinin doğum günü hər
bir vətəndaş üçün bayramdır».
Mədəniyyət və turizm
nazirinin müavini Sevda Məmmədəliyeva bayram münasibətilə
musiqi xadimlərini təbrik edərək, Milli Musiqi
Gününün önəmini vurğuladı. Qeyd olundu ki,
Üzeyir Hacıbəylinin doğum gününün Milli
Musiqi Günü kimi bayram edilməsi ulu öndər Heydər
Əliyevin təşəbbüsü olub. Ümummilli liderin
hakimiyyətdə olduğu illərdə Üzeyir bəyin
irsinin öyrənilməsinə, tədqiqinə, əsərlərinin
səhnələşdirilməsinə və
ekranlaşdırılmasına xüsusi diqqət yetirilib.
1975-ci ildə Üzeyir Hacıbəylinin ev-muzeyinin
yaradılması da bu diqqətin bariz nümunəsidir. Ulu
öndərin təşəbbüsü ilə Üzeyir
Hacıbəylinin 90, 100, 110 illik yubileyləri böyük təntənə
ilə keçirilib. Üzeyir bəyin irsinə diqqət bu
gün də davam edir. Dahi bəstəkarın 125 illik yubileyi
də prezident İlham Əliyevin imzaladığı sərəncamla
geniş şəkildə qeyd olunub.
Sevda Məmmədəliyeva onu da
xatırlatdı ki, Şərqin ilk operasının - dahi Azərbaycan
bəstəkarı Ü.Hacıbəylinin “Leyli və Məcnun”
əsərinin 100 illik yubileyi 2008-ci ildə UNESCO-da qeyd edildi,
bu hadisə bir daha Azərbaycan musiqisinin
böyüklüyünü bütün dünyaya
nümayiş etdirdi. Ü.Hacıbəylinin adını
daşıyan beynəlxalq festivalların Azərbaycan
musiqisinin təbliği baxımından xüsusi əhəmiyyət
daşıdığını söyləyən nazir
müavini, bəstəkarın irsinin öyrənilməsi və
təbliğində Heydər Əliyev Fondunun
gördüyü misilsiz işləri yüksək qiymətləndirdi:
“Üzeyir Hacıbəyli mürəkkəb və çətin
həyat yolu keçib, zamanında bir çox qüvvələr
ona təsir göstərməyə çalışıb.
Buna baxmayaraq, o, daima yaradıcılığı ilə məşğul
olaraq yolundan dönməmiş, milli musiqi tariximizi ölməz
əsərləri ilə bəzəmişdir”.
Tədbirin rəsmi hissəsindən
sonra konsert proqramı təqdim olundu. Konsertdə bəstəkarın
əsərlərindən nümunələr - «Cəngi»,
«Arşın mal alan” operettasından «Əsgərin
ariyası», «Gülçöhrənin ariyası», «Segah təsnifi»
və s. səsləndirildi.
Gülər
Mədəniyyət.-
2011.- 21 sentyabr.- S. 5.