Memarlıq abidələri təsviri sənət əsərlərində

Şirvanşahlar Sarayında sərgi

Sentyabrın 27-də Dünya Turizm Günü ilə əlaqədar «Şirvanşahlar Sarayı Kompleksi» Dövlət Tarixi-Memarlıq Qoruq-Muzeyində tanınmış rəssam, sənətşünas, professor Elturan Avalovun əsərlərindən ibarət sərgi açıldı. Sərgini muzeyin direktor müavini Təranə Balayeva açaraq tədbirin «Turizm ili» çərçivəsində təşkil olunduğunu nəzərə çatdırdı. Qeyd olundu ki, sərgidə müəllifin İçərişəhər, eləcə də Azərbaycan memarlıq abidələrini əhatə edən əsərləri nümayiş olunur. Natiq əsərləri Moskva və İstanbulda sərgilənən istedadlı fırça ustasının fərdi iş üslubundan söz açdı.

Elturan Avalovun yaradıcılığı barədə məlumat verən sənətşünas, Əməkdar incəsənət xadimi Ziyadxan Əliyev onun əsərlərində Qarabağ mövzusunun geniş yer aldığını diqqətə çatdırdı: «Elturanın çəkdiyi əsərlərdə Azərbaycanın təbiəti, memarlığı təsvir olunur. Mənə elə gəlir ki, onun qədər əsərlərini Qarabağa həsr edən ikinci bir insan yoxdur. Yaradıcılığı tükənməz olan Elturan Avalovun memarlıq abidələrinə böyük sevgisi var».

Daha sonra çıxış edən rəssam Yaşar Səmədov isə Elturan Avalovun əsərlərinə daim müraciət olunacağını və onun tarixi abidələrə müraciət edə-edə canlı abidəyə çevrildiyini vurğuladı.

Sonra iştirakçılar rəssamın Şuşa memarlığı, İçərişəhər, Gəncə və Ordubad abidələrini böyük ustalıqla təsvir etdiyi işlərinə tamaşa etdilər.

Gülər

Mədəniyyət.- 2011.-30 sentyabr.- S. 13.