“Ortaq mədəni dəyərlərimizi qorumalı və dünyaya layiqincə təqdim etməliyik”
Türkdilli ölkələrin
musiqişünasları daha tez-tez görüşmək və
qarşılıqlı fikir mübadiləsi aparmaq istəyirlər
Xəbər verdiyimiz kimi, ötən
ay Bakıda keçirilən «Türkdilli xalqların musiqi alətləri»
adlı beynəlxalq simpozium dünyanın bir çox ölkələrindən
musiqişünasları, alimləri bir araya gətirmişdi. Onların
arasında Türkiyədən tanınmış musiqi
tarixçisi Oğuz Elbaş və Rusiya Federasiyasının
Tatarıstan Respublikasından Qennadi Makarov da vardı. Hər
iki musiqişünasla söhbətimizdə türkdilli
xalqların musiqi mədəniyyəti ilə bağlı
fikirlərini öyrəndik.
- Oğuz bəy, eyni kökə
malik olan türkdilli xalqların bölüşdüyü
ortaq mədəni dəyərlər var. Onlardan biri də
musiqidir. Bu baxımdan türkdilli xalqların
musiqişünaslarını, alimlərini bir araya gətirən
belə tədbirlərin əhəmiyyətini necə dəyərləndirirsiniz?
- Təbii ki, belə simpozium və
konfranslar türk xalqlarının bir-birinin musiqi dəyərlərini
dərindən anlaması, qarşılıqlı şəkildə
faydalanması baxımından son dərəcə önəmlidir.
Bu tədbirlər vəsiləsi ilə onlar bir-birlərinin mədəni
zənginliklərini daha yaxşı anlayırlar. Məhz belə
tədbirlərdən sonra mədəni körpülər daha
da güclənir, möhkəmlənir. Bu simpozium həm də
bizim üçün önəmli bir missiyanı yerinə
yetirir. Bu baxımdan tədbirin təşkilinə görə
Azərbaycan dövlətinə öz minnətdarlığımı
bildirirəm.
- Sizin məruzəniz «Anadolunun qədim
dövr musiqi alətləri» mövzusunda idi. Maraqlıdır,
Türkiyədə bu məsələ nə dərəcədə
aktualdır?
- Bu
simpoziumda iştirak etməklə bir daha gördüm ki, Azərbaycanda
olan musiqi alətlərinin əksəriyyəti eynilə bizim
ifa etdiyimiz alətlərdir. Amma bir məqamı da
vurğulayım ki, ölkənizdə ilk dəfə
gördüyüm türk musiqi alətləri də oldu. Əlbəttə,
bir musiqiçi kimi bu mənim üçün çox
maraqlıdır. Bundan sonra çalışacam ki,
türkdilli xalqlara məxsus belə musiqi alətlərini daha
yaxından tanıyım və öyrənim. Bunlar bizim dəyərlərimizdir,
onları qorumalı və dünyaya təqdim etməliyik. Belə
qədim musiqi alətlərinin mövcudluğu türk
xalqlarının mədəniyyətinin necə qədim tarixə
malik olduğunu isbatlayır. Beləliklə, bir daha
vurğulamaq istərdim ki, bu cür tədbirlərdə hər
kəs bir-birini daha yaxşı başa düşür. Ortaq
nəyimiz var, onu analiz etmək imkanlarını tapa bilirik.
Odur ki, belə görüş və toplantıları tez-tez
keçirməli, qarşılıqlı fikir mübadiləsini
sıxlaşdırmalıyıq.
- Oğuz bəy, siz ortaq musiqi alətlərimizin
dünyaya daha yaxşı tanıdılmasının
vacibliyindən danışdınız. Bu istiqamətdə
türkdilli xalqlar nə qədər fəaldır?
- Biz
türk dünyası ölkələri bu məsələdə
çox zəifik. Musiqimizə,
çalğılarımıza yetərincə daha
güclü sahib çıxmalı, onları
qorumalıyıq. Türkiyədə qədim musiqi alətləri
hələ də ifa edilir. Hər bir musiqi aləti
özlüyündə çox dəyərlidir. Biz öz dəyərlərimizi
ortaya qoyan zaman dünya mədəni irsi də bizə maraq
göstərəcək. Sadəcə türkdilli xalqlar
özləri buna cəhd etməlidir. Tanıtım, təbliğat
məsələsinə ciddi fikir verməliyik. Məsələn,
musiqi muzeyləri yaratmaq, musiqi CD-ləri, filmlər
hazırlamaq, dünya çapında nəşrlər etməyimiz
bu baxımdan çox vacibdir. Bunlar son dərəcə önəmli
məsələlərdir. Bir sözlə, dünya
standartlarına uyğun işlər ortaya qoysaq, kimsəyə
ehtiyacımız qalmayacaq. Qədim türk musiqi alətləri
ilə bağlı ciddi işlərimizin bütün
dünyanı sarsıdacağına inanıram.
* * *
Gennadı Makarov, Kazan Dövlət
Konservatoriyasının “Tatar musiqisi və etnomusiqi”
kafedrasının əməkdaşı: «İtirdiklərimizi
qaytarmağa, bərpa etməyə, yüksəltməyə
çalışırıq»
- Tatar mədəniyyətinin
xüsusi, özünəməxsus tarixçəsi var. XVI əsrdə
Kazan xanlığı Rusiya tərəfindən işğal
olundu və biz çox şey itirdik. Amma olanlar izsiz itmir. Ona
görə indi bizim arzumuz olanlarımızı, nə vaxtsa
itirdiklərimizi qaytarmaq, bərpa etmək, yüksəltməkdir.
Bu, hər şeydən əvvəl Kazan xanlığı dövrünün
elitar musiqisi, Şərq ənənələri ilə
bağlı olan musiqimizdir. Digər tərəfdən bu musiqi
müxtəlif etnik qruplara aiddir və bizim musiqimiz etnik
musiqidir. Çünki tatarların çoxlu müxtəlif
etnik qrupları mövcuddur. Sibir tatarları, Həştərxan
tatarları və digərlərinin hər birinin öz
xüsusi, özünəməxsus musiqiləri var. Bütün
bunları qorumaq istəyirik və yavaş-yavaş buna
doğru gedirik.
Bakıda təşkil olunmuş
simpozium bizə çox böyük impuls, güc verdi. Sadəcə
olaraq başa düşdüm ki, dəyərlərimizi qorumaq
üçün cəhd etmək lazımdır. Çünki
biz başqa ölkələrin uğurlarını
görürük. Məsələn, Azərbaycanda Məcnun Kərimovun
rəhbərlik etdiyi Qədim Musiqi Alətləri
Ansamblını görəndə mən çox sevindim və
bununla fəxr etdim. Öz simasını saxlamaq, musiqi alətləri
qorumaq böyük işdir. Bütün dünya Azərbaycan
musiqisini belə ansambla görə tanıyır. Məhz belə
bir xalq bu xüsusiyyətlərinə görə digərlərindən
fərqlənə və xüsusi xarakterə malik ola bilər.
Bu bizim üçün gözəl örnəkdir.
- Bu gün necə, tatarların
öz milli-mənəvi dəyərlərini qorumaq,
keçmiş mədəni nailiyyətləri bərpa etmək
istiqamətində hansı maneələrlə
qarşılaşırmı?
- İndi bütün dünyada qloballaşma prosesi gedir. Bu prosesdə xalqlar öz milli mədəni özəlliklərini itirmək
istəmirlər. Tatar xalqının da bu cür problemi
var. Biz Rusiyada yaşayırıq,
dövlət dili rus dilidir. Amma hər bir şeyə
rəğmən çox
şadıq ki, Tatarıstan Respublikası
var. Proseslər belə
getsə, tezliklə
biz tatarlar da bu istiqamətdə uğurlara nail olacağıq.
Amma deyim ki, Azərbaycandan
öyrənəcəklərimiz də çoxdur. Məsələn, elə götürək,
bu simpoziumu. İndiyə
qədər türkdilli
xalqların musiqiçilərini
bir araya gətirən belə bir forum keçirilməmişdi.
Görüşmək, fikir mübadiləsi
aparmaq imkanı əldə etdik. Köhnə əlaqələri bərpa
etdik. Ona görə Azərbaycan
dövlətinə öz
minnətdarlığımı bildirirəm.
Mehparə
Mədəniyyət.-
2011.- 12 yanvar.- S. 5.