Azərbaycan
xalçaçılıq ənənələri muzey
təhsilində
Röya Tağıyeva: “Muzey təkcə gəzinti məkanı
deyil, həm də bilik mənbəyi olmalıdır”
Yanvarın 10-da Lətif Kərimov
adına Azərbaycan Xalçası və Xalq Tətbiqi Sənəti
Dövlət Muzeyində muzey tərəfindən hazırlanmış
xüsusi təhsil proqramına uyğun «Azərbaycan
xalçaçılıq ənənələri muzey təhsilində»
adlı təlim-seminar keçirildi. Tədbir Mədəniyyət
və Turizm Nazirliyi, UNESCO-nun Moskva bürosu və Lətif Kərimov
adına Azərbaycan Xalçası və Xalq Tətbiqi Sənəti
Dövlət Muzeyi tərəfindən təşkil
olunmuşdu.
Təlim-seminarı giriş
sözü ilə açan Lətif Kərimov adına Azərbaycan
Xalçası və Xalq Tətbiqi Sənəti Dövlət
Muzeyinin direktoru Röya Tağıyeva bildirdi ki, Azərbaycan
xalçasının dünyada layiqli surətdə
tanıdılması üçün həm dövlət, həm
də qeyri-dövlət qurumları tərəfindən
ardıcıl və məqsədyönlü iş
aparılır: “2010-cu ilin noyabrında Azərbaycan
xalçaçılıq sənəti UNESCO-nun Qeyri-maddi Mədəni
İrsin Qorunması üzrə Reprezentativ siyahısına
daxil edildi. Bu, Azərbaycan xalçalarının dünya
miqyasında tanınmasının daha bir bariz göstəricisi
idi. Onu da qeyd edim ki, UNESCO-nun qəbul etdiyi müvafiq
konvensiyalarda qeyri-maddi irs nümunələrinin məhv
olunmasının qarşısını almaqla bağlı
mühüm müddəalar yer alıb. Bu beynəlxalq sənədlər
Azərbaycan xalçalarının da qorunması
üçün mühüm önəm kəsb edir”.
Sonra R.Tağıyeva təlim-seminarın
əsas məqsədindən danışdı: “Burada əsas
məqsəd Azərbaycanın milli-mədəni irsinin muzeylər
vasitəsilə təbliği, bu yolla təhsilin möhkəmləndirilməsi,
ənənəvi incəsənətin, sənətkarlığın,
yaradıcılığın potensialını
artırmaqdır. 2007-2010-cu illərdə UNESCO-nun
konvensiyalarına qoşulmuş Azərbaycan mədəni
irsinin mühafizəsi üzrə münbit mühitin
yaradılmasını təmin edib”.
R.Tağıyeva Azərbaycanın ənənəvi
toxuculuq zonalarında xalçaçılığın
inkişafı məqsədilə muzey təhsilinə aid məlumat
kitabçası tərtib edildiyini, həmin kitabçanın
muzey və təlim müəssisələrində
yayılmasının nəzərdə tutulduğunu dedi. Həmçinin
bildirdi ki, Azərbaycanın orta məktəblərində
muzey işinin ayrıca fənn kimi tədris olunması
üçün Təhsil Nazirliyinə müraciət edəcəklər:
«Muzey işi orta məktəbdən öyrənilməli və
bu sahəyə maraq artmalıdır. Bu ilin mayından orta məktəb
şagirdləri üçün muzey təhsili
proqramının tətbiqinə başlamaq niyyətindəyik.
Mən istərdim ki, Azərbaycan Təhsil Nazirliyinin
proqramlarına muzey təhsili xüsusi bir fənn kimi daxil
olsun. Muzey təkcə gəzinti məkanı deyil, həm də
bilik mənbəyi olmalıdır. Muzey təhsili çox
ölkələrdə təcrübədən keçirilib.
Biz də istərdik ki, Azərbaycanda da öz yerini tutsun. Muzey
təhsilinin ənənəvi təhsildən fərqi odur ki,
təlimçi işi elə qurur ki, iştirakçı
şəxs özü bu təhsilə yiyələnir».
Təlimdə Bakı, Gəncə,
Şəki, Xaçmaz, Şabran, Tovuz, Ağcabədi,
Göyçay, Zərdab, Lənkəran, Qəbələ,
Quba və Füzuli rayonlarının müxtəlif muzeylərinin
rəhbərləri iştirak edirdi.
Mehparə
Mədəniyyət.-
2011.- 12 yanvar.- S. 4.