Baba Mahmudoğlunun 70 illiyinə həsr olunmuş xatirə gecəsi

Yanvarın 26-da Beynəlxalq Muğam Mərkəzində unudulmaz xanəndə, Xalq artisti Baba Mahmudoğlunun anadan olmasının 70 illiyinə həsr olunmuş xatirə gecəsi keçirilib. Mədəniyyət və incəsənət xadimlərinin iştirak etdikləri tədbirdə xanəndənin həyat və yaradıcılığından söhbət açılıb.

Qeyd olunub ki, Baba Mahmudoğlu sənətsevərlərin xatirəsində təkcə səhnəmizdə ustalıqla yaratdığı parlaq və bənzərsiz obrazları, şaqraq zəngulələri ilə deyil, həm də həyat və sənət məsələlərinə orijinal baxışı olan geniş erudisiyalı bir ziyalı kimi qalıb.

Mərasimdə xanəndənin xatirəsinə həsr olunmuş rəngarəng konsert proqramı təqdim edilib. Xalq artistləri Arif Babayevin, Qəndab Quliyevanın, Səkinə İsmayılovanın, əməkdar artistlər Gülüstan Əliyevanın, Vəsilə İbrahimovanın, Zeynəb Behbudovanın, Ədilə Əflakinin və digər sənətkarların ifaları alqışlarla qarşılanıb.

Mədəniyyət.- 2011.- 28 yanvar.- S. 15.