Bölgələrdə mədəniyyətin inkişafı daim diqqət mərkəzindədir

Azəri Əhmədzadə,

Mədəniyyət və Turizm Nazirliyi Regionlarla iş sektorunun müdiri

Ötən beş ildə Mədəniyyət və Turizm Nazirliyinin prioritet fəaliyyət istiqamətlərindən biri də bölgələrlə bağlı olmuşdur. Bu müddətdə regionlarda mədəniyyət və turizmin inkişafına xüsusi diqqət yetirilmiş, bir çox maraqlı layihələr həyata keçirilmişdir.

Regionlarla iş barədə danışarkən yerlərdə gənc nəslin mədəni tərbiyəsi sahəsində görülən işləri, uşaq və yeniyetmə ifaçıların iştirakı ilə müxtəlif müsabiqələrin keçirilməsini ayrıca qeyd etmək lazımdır. 2006, 2008 və 2010-cu illərdə Astara şəhərində Uşaq muğam ifaçılarının III, IV və V respublika müsabiqələri keçirilmişdir. 2008-ci ildə Sumqayıt, Xırdalan, Şəki şəhərlərində və Şamaxı, Qəbələ, Balakən rayonlarında, 2010-cu ildə isə Lənkəran şəhərində, Lerik, Yardımlı, Cəlilabad və Biləsuvar rayonlarında müsabiqə qaliblərinin konsertləri təşkil olunmuşdur. Həmin illərdə Gənc aşıqların Aşıq Şəmşir adına III, IV və V respublika müsabiqələri gerçəkləşmiş, Bakı şəhərində R.Behbudov adına Mahnı Teatrında və Gəncə Dövlət Dram Teatrında müsabiqə qaliblərinin təltif olunma mərasimləri və onların iştirakı ilə konsertlər keçirilmişdir.

Ötən müddət ərzində nazirliyin rəhbər işçiləri Şəki, Quba, Qusar, Gədəbəy, Sabirabad, Lerik, Balakən, Astara, Zaqatala, Qax rayonlarında kənd mədəniyyət işçiləri ilə görüşlər keçirmiş, onlara müvafiq tövsiyələr vermişlər. Bundan əlavə, Ağsu, Göyçay, Qəbələ, Ağdaş, Quba, Xaçmaz, Mingəçevir, Yevlax, Salyan və Neftçala şəhərlərində yazıçı, şair, bəstəkar, incəsənət ustalarının yerli əhali ilə görüşləri gerçəkləşmişdir.

* * *

Hər il mütəmadi olaraq Novruz bayramı, Milli Qurtuluş günü, Ramazan bayramı, Qurban bayramı, Yeni il bayramı ərəfəsində Salyan rayonunda müvəqqəti məskunlaşmış məcburi köçkün ailələri ilə rayon mədəniyyət evində görüşlər keçirilmiş, onlara ərzaq yardımı paylanmış və konsert proqramları təşkil olunmuşdur.

2006-cı ilin avqustunda Baş nazirin müavini Əli Həsənovun və müvafiq rayonların İcra Hakimiyyəti başçılarının iştirakı ilə «Ərazisi müvəqqəti işğal olunmuş rayonların mədəniyyət sahəsində problemləri» mövzusunda keçirilmiş müşavirənin tövsiyələrinə, habelə həmin rayonların İcra Hakimiyyətlərinin təqdim etdikləri təkliflərə əsasən «Ərazisi müvəqqəti işğal olunmuş rayonların mədəniyyət müəssisələrinin inkişafı, onların fəaliyyətinin yaxşılaşdırılması üzrə tədbirlər planı» hazırlanmışdır.

Həmin ilin noyabrında Salyan rayonunda Şirvan şəhər, Hacıqabul, Neftçala, Salyan, Sabirabad, Biləsuvar, Saatlı, Beyləqan və İmişli Rayon Mədəniyyət və Turizm şöbələrinin iştirakı ilə zona müşavirəsi keçirilmişdir.

* * *

2007-ci ildə Salyan və Şirvan şəhərlərində, 2009-cu ildə isə Mingəçevir və Yevlax şəhərlərində milli musiqi alətləri ifaçılarının respublika müsabiqələri təşkil olunmuşdur. Həmin ilin aprelində Şamaxı rayonunda Ağdaş, Göyçay, İsmayıllı, Ağsu və Şamaxı, may ayında Şəkidə Şəki şəhər, Balakən, Zaqatala, Qax, Oğuz və Qəbələ rayon mədəniyyət və turizm şöbələrinin iştirakı ilə zona müşavirəsi keçirilmişdir. 2007-ci ilin iyununda Şəkidə «Sənətkarlar günü» tədbiri təşkil edilmişdir.

Həmin ildə daha bir maraqlı tədbir Sloveniya Respublikasının Novo Qoritsa şəhərində Sovet İttifaqı Qəhrəmanı Mehdi Hüseynzadənin büstünün ucaldılması olmuşdur. Eyni ildə Rusiya Federasiyasının Taqanroq şəhərində keçirilmiş MDB və Baltikyanı ölkələrin VII Beynəlxalq “Sodrujestvo” Festivalında Şəki şəhər mədəniyyət evinin «Zirvə» xalq instrumental ansamblı və xalq sənətkarlarından ibarət 20 nəfərlik nümayəndə heyətinin, habelə Acarıstan Muxtar Respublikasının Kobuleti şəhərində «Kobuleti-2007» adlı gürcü xalq mahnı və rəqsləri festival-müsabiqəsində Qax-İngiloy kənd mədəniyyət evinin «İmedi» rəqs kollektivinin iştirakı təmin edilmişdir.

* * *

2008-ci ildə Xaçmaz rayonunda yeni yaradılmış Rəsm Qalereyasının ekspozisiyasının zənginləşdirilməsi məqsədilə 28 ədəd rəsm əsəri Xaçmaz şəhərinə göndərilmişdir. Həmin ilin avqustunda İsveçrənin Bazel şəhərində yerləşən İncəsənət Xidmətləri təşkilatının rəhbəri Yurrian Kooimanın İsmayıllı, Qəbələ, Şəki və Qax rayonlarına səfəri təşkil edilmişdir. Sentyabrda isə cəbhə bölgələrində yerləşən hərbi hissələrə və qaçqın şəhərciklərində yaşayan əhaliyə mədəni xidmət işini gücləndirmək məqsədilə Bərdə, Tərtər, Ağdam və Füzuli rayonlarında konsertlər verilmişdir. Oktyabr ayında Qəbələ rayonunda rəssamlıq simpoziumu keçirilmiş, Qəbələ Rayon Dövlət Rəsm Qalereyasının ekspozisiyasının zənginləşdirilməsi məqsədilə 12 rəsm əsəri alınaraq bu müəssisəyə əvəzsiz olaraq verilmişdir.

«Elektron hökumət» Dövlət Proqramının icrasına hazırlıq məqsədilə 2008-ci ildə Xaçmaz şəhərində Xaçmaz, Quba, Qusar, Dəvəçi, Siyəzən, Xızı və Abşeron; Şəki şəhərində Şəki, Zaqatala, Qax, Qəbələ, Oğuz, Balakən, İsmayıllı, Şamaxı, Qobustan, Ağdaş, Ağsu, Kürdəmir, Ucar və Zərdab, 2009-cu ildə Lənkəran şəhərində Lənkəran şəhər, Astara, Masallı, Cəlilabad, Lerik, Yardımlı rayon; Gəncə şəhərində Gəncə, Yevlax, Naftalan şəhər, Ağstafa, Qazax, Daşkəsən, Tovuz, Şəmkir, Gədəbəy, Göygöl, Samux rayon mədəniyyət və turizm şöbə müdirlərinin və müəssisə rəhbərlərinin iştirakı ilə seminar təşkil edilmişdir.

2008-ci ildə Füzuli, Ağcabədi, 2009-cu ildə Salyan, Biləsuvar, Beyləqan, 2010-cu ildə isə Bərdə, Tərtər, Ağdam, Füzuli rayonlarında və Ağcabədi rayonu Taxtakörpü qəsəbəsində məskunlaşmış qaçqın və məcburi köçkün ailələri üçün “Qış nağılı” adlı bayram şənlikləri gerçəkləşmişdir.

Hər il martın 20-də Bakı şəhərində keçirilən «Novruz» bayramı şənliklərində regionlarda fəaliyyət göstərən şəhər və rayon folklor kollektivlərinin də iştirakı təmin edilmişdir.

* * *

2009-cu ilin aprel ayında Lənkəran şəhər, Astara, Masallı, Cəlilabad, Lerik, Yardımlı , iyun ayında Gəncə şəhərində Gəncə şəhər, Ağstafa, Qazax, Tovuz, Şəmkir, Gədəbəy, Göygöl, Samux rayon mədəniyyət və turizm idarələri və şöbələrinin, mədəniyyət müəssisələrinin fəaliyyəti nazirliyin səyyar kollegiya iclaslarında müzakirə edilmişdir.

Həmin ilin iyununda respublikanın şəhər və rayonlarında «Yaşadığım dünya» adlı əlillərin yaradıcı aksiyası və «İstedadlı uşaqlar» Proqramı çərçivəsində respublikanın şəhər və rayonlarında sərgilər, ədəbi-bədii gecələr, müsabiqələr, konsertlər keçirilmişdir. İyunda həmçinin «Doğma diyar uşaqların gözü ilə» adlı foto və rəsm festivalı çərçivəsində Quba, Qusar, Xaçmaz, Dəvəçi, Siyəzən, Xızı rayonlarında tədbirlər keçirilmiş, Qubada seçilmiş foto və rəsm əsərlərindən ibarət sərgi təşkil edilmişdir. İyulda Şəkidə Gəncə, Sumqayıt, Mingəçevir, Şəki, Lənkəran şəhər, Abşeron, Qax, Quba, Qəbələ, Xaçmaz rayonlarında təşkil olunan rəsm müsabiqəsi qaliblərinin iştirakı ilə rəssamlıq simpoziumu yaddaqalan hadisələrindən olmuşdur.

2009-cu ilin oktyabrında Bərdə şəhərində «İstedadlı uşaqlar»ın muğam, mahnı ifaçılığı, aşıq musiqisi, instrumental ifaçılıq üzrə respublika müsabiqəsi qaliblərinin yekun konserti təşkil edilmişdir. Noyabrda Yevlax şəhərində «Azərbaycanım mənim» respublika vətənpərvərlik mahnıları ifaçılarının müsabiqəsinin yekun turu keçirilmişdir.

* * *

2010-cu ilin fevralında Xırdalan, Masallı, Mingəçevir və Zaqatala şəhərlərində zonalar üzrə özfəaliyyət rəqs kollektivlərinin «Çal, oyna - 2010» respublika baxış-müsabiqəsi keçirilmişdir. Mart ayında Beyləqan, Biləsuvar və Salyan rayonlarında yerləşən qaçqın şəhərciklərində incəsənət ustalarının iştirakı ilə Novruz şənlikləri gerçəkləşmişdir. Apreldə “Yeni adlar” ədəbi gənclərin ümumrespublika müsabiqəsi keçirilmiş, şeir və nəsr nominasiyaları üzrə 10 nəfər gənc qalib elan olunmuşdur. Şamaxı şəhərində müsabiqə qaliblərinin təltif olunma mərasimi və ədəbi-bədii gecə təşkil edilmişdir.

Rusiya Federasiyası Dağıstan Respublikasının “Ləzginka” Dövlət Akademik Əməkdar Rəqs Ansamblının 2010-cu ilin mayında Qəbələ və Xaçmaz rayonlarında konsertləri əhali tərəfindən maraqla qarşılanmışdır.

İyunda Qaxda, iyulda Şamaxıda, oktyabrda isə Qusarda rəssamların yaradıcılıq emalatxanaları təşkil olunmuşdur. Ötən il həmçinin “Azərbaycan rəqs geyimi” albomu hazırlanmış və 500 nüsxə tirajla nəşr edilmişdir.

Mədəniyyət.- 2011.- 26 yanvar.- S. 17.