Son beş il Azərbaycan kinosunun inkişafında mühüm uğurlarla yadda qalıb

Cəmil Quliyev,

Azərbaycan Dövlət Film Fondunun direktoru, Əməkdar incəsənət xadimi

Mədəniyyət və Turizm Nazirliyi yarandığı gündən Azərbaycan kinosunun inkişafı istiqamətində çox böyük işlər görüb. Ölkə prezidenti möhtərəm İlham Əliyev cənablarının kino ilə bağlı imzaladığı iki mühüm sərəncam Azərbaycan kinosunun inkişafına təkan verdi və Mədəniyyət və Turizm Nazirliyi də bu mühüm sərəncamları əldə rəhbər tutaraq, çox səmərəli fəaliyyətə başladı.

Bu illər ərzində Dövlət Film Fondunun yeni binası tikilib istifadəyə verildi, binaya müasir avadanlıqlar gətirildi. Bu gün “Nizami” kinoteatrının əsaslı təmiri, “Azərbaycanfilim” kinostudiyasının maddi-texniki bazasının yaxşılaşdırılması istiqamətində böyük işlər görülür.

Təbii ki, bu beş il ərzində çoxlu filmlər çəkilib. Ötən il 10 bədii film çəkilib. Hətta sovetlər dövründə belə, bir il ərzində Azərbaycanda bu sayda film çəkilmirdi.

Bu gün Mədəniyyət və Turizm Nazirliyinin dəstəyi ilə Azərbaycan kinosuna gənclər gəlir, onlar filmlərin çəkilişlərinə cəlb olunur, beynəlxalq festivallarda iştirak edirlər. Mədəniyyət və Turizm Nazirliyinin dəstəyi ilə həyata keçirilən “Bu meydan, bu ekran” layihəsi çərçivəsində gənc ssenaristlər, gənc rejissorlar, gənc aktyorlar, operatorlar ilk addımlarını atıb qısametrajlı filmlər çəkirlər.

Mədəniyyət və Turizm Nazirliyi beş illik fəaliyyəti dövründə sənədli filmin inkişafına böyük diqqət yetirib. “Yaddaş” və “Salnamə” dövlət sənədli film studiyaları çox aktiv, səmərəli fəaliyyət göstərir. “Debüt” studiyası yenidən bərpa olunub. Hazırda nazirliyin dəstəyi ilə Azərbaycanda cizgi filmləri çəkilir və bu cizgi filmlərinin çəkilməsi üçün ölkəmizə müasir texnologiyalar gətirilir.

“Azanfilm” studiyası səmərəli fəaliyyət göstərir. Son beş ildə Azərbaycanda “Hökmdarın taleyi”, “Cavid ömrü”, “Cavad xan” tarixi filmləri çəkilib, hazırda tarixi mövzuda yeni layihələr həyata keçirilir.

Mədəniyyət və Turizm Nazirliyinin dəstəyi ilə Azərbaycan filmləri bir çox ölkələrdə nümayiş olunub, beynəlxalq festivallarda iştirak edib. Bu gün nazirlik kinofilmlərin istehsalatına başqa ölkələrdən mütəxəssislər cəlb edir, artıq Rusiya, Gürcüstan, Türkiyə ilə müştərək filmlər çəkilir. Eyni zamanda qeyd eləmək istəyirəm ki, regionlarda da kinonun inkişafı, kinoteatrların tikilməsi, kino şəbəkəsinin yaradılması ilə bağlı çox böyük işlər görülür. Bütün bunlar sübut edir ki, Mədəniyyət və Turizm Nazirliyi beş il ərzində Azərbaycan kinosu sahəsində çox mühüm addımlar atmışdır.

Xamis Muradov,

“Azərbaycanfilm” Dövlət Kinostudiyasının direktoru, Xalq artisti

Beş illik fəaliyyəti dövründə Mədəniyyət və Turizm Nazirliyinin kinomuza diqqət və qayğısı bir çox işlərdə özünü göstərib. Azərbaycan kinosunda yaradıcılıq nöqteyi-nəzərdən filmlərin sayı çoxalıb. Son illər istehsalata buraxılan filmlərin sayı artır. Gənc nəslə daha çox üstünlük verilir, gənclərin kinoya axını artıb. Yeni gələn nəsil məhz Mədəniyyət və Turizm Nazirliyinin göstərdiyi bu qayğı sayəsində uğurlara imza atırlar. Azərbaycan kinosunun inkişafı ilə bağlı prezidentin imzaladığı sərəncamlar kinoya olan qayğıdan irəli gəlir və bu bizi çox sevindirir. Bu sərəncamlar Azərbaycan kinosunda sıçrayış olacağına böyük ümid verir. “Azərbaycanfilm” kinostudiyasının əsaslı təmiri məni ən çox sevindirən məsələlərdən biridir. Bu qayğı və diqqətə görə möhtərəm prezidentə, mədəniyyət və turizm nazirinə təşəkkürümü bildirirəm.

Oqtay Mirqasımov,

kinorejissor, Xalq artisti

Mədəniyyət və Turizm Nazirliyinin beşillik fəaliyyəti geniş hadisələrlə yaddaşımda qalıb. Kinoya aid keçirilən tədbir və yenilikləri müsbət hal kimi qiymətləndirirəm. Düşünürəm ki, Mədəniyyət və Turizm Nazirliyinin son illərdə apardığı siyasət doğrudur və irəli sürülən təşəbbüslər mədəniyyətimizə olan qayğının göstəricisidir. Bu illər ərzində beynəlxalq əlaqələrin qurulması da böyük uğurdur. Çünki kino elə bir sahədir ki, mütləq əlaqələr qurulmalı, təbliğ edilməlidir. Bunu dünya praktikası da göstərir ki, beynəlxalq əlaqələr nəticəsində nailiyyətlər qazanmaq mümkündür. Bu yaxınlarda dünya kinosunun məşhur simalarından olan Jerar Depardyenin ölkəyə gəlməsi və onunla Mədəniyyət və Turizm Nazirliyi tərəfindən aparılan danışıqlar dünya kinosuna aparan bir cığırdır. İstehsalata buraxılan filmlər, xarici ölkələrlə əməkdaşlıq, birgə layihələr - bütün bunlar çox müsbət haldır. Həmçinin mədəniyyətin başqa sahələrində bu inkişafı görmək mümkündür. Muzeylərdə də görülən peşəkar işlər göz önündədir. Sənət adamlarına maddi və mənəvi diqqəti də doğru qiymətləndirirəm. Mədəniyyət və Turizm Nazirliyinə növbəti illərdə daha böyük uğurlar diləyirəm.

Mədəniyyət.- 2011.- 28 yanvar.- S. 13.