“Turizm sektoru bu illər ərzində daima dövlətin dəstəyini hiss edib”

Nahid Bağırov,

Azərbaycan Turizm Assosiasiyasının prezidenti

- Beş il ərzində Mədəniyyət və Turizm Nazirliyinin dəstəyi ilə Azərbaycanda turizm sahəsi çox geniş inkişaf mərhələsinə qədəm qoyub. Ölkəmiz artıq dünyada yeni bir turizm istiqaməti kimi tanınmağa başlayıb. Əgər bir neçə il əvvələdək Azərbaycanın adı xarici ölkələrdə daha çox neftlə tanınırdısa, indi Bakı deyəndə xaricilər qədim və zəngin tarixə malik maraqlı bir turizm şəhərini təsəvvür edirlər. Bunlar hamısı məqsədyönlü fəaliyyətin, düzgün təbliğatın nəticəsidir. İldən-ilə xarici ölkələrdə keçirilən beynəlxalq turizm sərgilərində ölkəmizin təmsilçiliyinin dairəsi genişlənir.

Mədəniyyət və Turizm Nazirliyinin dəstəyi ilə mövcud problemlərin aradan qaldırılması və turizm şirkətlərinin mənafelərinin qorunması məqsədilə 2009-cu ildə Azərbaycan Turizm Assosiasiyası yaradıldı. Mədəniyyət və turizm naziri Əbülfəs Qarayev assosiasiyanın yaradılmasını ölkəmizdə turizmin inkişafı istiqamətində atılmış əhəmiyyətli addım kimi qiymətləndirir. Assosiasiyanın fəaliyyəti özəl turizm obyektlərinin birləşməsi, irihəcmli layihələrin birgə həyata keçirilməsi, Azərbaycanın turizm potensialının beynəlxalq aləmdə daha geniş təbliğ olunmasına kömək edir. Bu qurumu təsis etməkdə əsas məqsədimiz beynəlxalq turizm assosiasiyaları ilə əlaqələr qurmaq, regionda rəqabət apara biləcək turizm bazarının yaradılmasına və inkişafına, turizm sahəsində xidmətin yüksək səviyyədə təşkilinə nail olmaq idi. Hesab edirəm ki, biz öz məqsədimizə qismən də olsa çatmışıq.

Turizm özəl sektor olsa da, dövlətin dəstəyi olmadan yüksək nəticələr əldə etmək mümkün deyil. Biz bu dəstəyi Azərbaycan dövləti, Mədəniyyət və Turizm Nazirliyi, şəxsən hörmətli nazir tərəfindən həmişə hiss etmişik. Məhz buna görə Azərbaycan turizmi inkişaf edir, ildən-ilə ölkəmizə gələn turistlərin sayı artır və yeni bir turizm məkanı kimi respublikamız dünyada daha geniş tanınır.

Mədəniyyət.- 2011.- 28 yanvar.- S. 12.