İndiyədək əldə olunan nəticələr turizmin inkişafı üçün böyük zəmin yaradıb

Cəfər Cəfərov,

Azərbaycan Turizm İnstitutunun rektoru, tarix elmləri doktoru

Ölkəmizin milli-mədəni irsinin qorunub saxlanmasında, təbliğ edilməsində, dünya mədəniyyəti ilə qovuşmasında, ölkə həyatının mühüm bir sahəsini təşkil edən turizmin inkişafında, Azərbaycanın beynəlxalq turizm aləminə sistemli və ardıcıl dövlət siyasətini həyata keçirən Mədəniyyət və Turizm Nazirliyi bu günlər öz fəaliyyətinin 5 illiyini qeyd edir. Turizm bütün dünyada həm də mədəniyyəti geniş miqyasda təbliğ edən vasitələrdən sayılır. Bu iki sahənin bir-birinə daha da yaxınlaşması mövcud imkanlardan səmərəli istifadəyə zəmin yaradır. Mədəniyyət və Turizm Nazirliyi 5 il ərzində ölkəmizin turizm potensialının işlək hala gətirilməsi üçün müasir tələblərə cavab verən infrastrukturun qurulması, bu sahənin dünya standartları səviyyəsinə qaldırılması istiqamətində bir sıra mühüm işlər həyata keçirmişdir.

Mədəniyyət və Turizm Nazirliyinin yeni strukturda fəaliyyətə başlaması ilə, demək olaraq ki, eyni vaxtda Azərbaycan Turizm İnstitutu yaradılmışdır. Bununla da turizm sənayesinin əsas göstəricisi olan kadr potensialının artırılmasına təkan verildi. Turizm İnstitutu bu sahədə kadr hazırlığını həyata keçirməklə yanaşı, mövcud turizm sənayesi işçilərinin peşə vərdişlərinin təkmilləşdirilməsi üçün qısamüddətli kurslar da təşkil etməkdədir. İnstitutda təhsil prosesində beynəlxalq təcrübədən geniş istifadə edilir, bir sıra tanınmış ali məktəblərlə qarşılıqlı əməkdaşlıq həyata keçirilir. O cümlədən Avstriyanın Krems Tətbiqi Elmlər Universiteti ilə ikili diplom verilməsi sahəsində birgə təhsil proqramı davam etdirilir. Tələbələr təcrübə semestri ərzində bir sıra yerli və beynəlxalq turizm müəssisələrində səriştə qazanırlar.

İndiyədək ölkəmizin turizmdə əldə etdiyi nəticələr bu sahədə daha geniş inkişaf üçün böyük zəmin yaradıb. Əminik ki, 2011-ci ilin cənab prezident tərəfindən «Turizm ili» elan olunması, yaxın vaxtlarda paytaxtımızda yeni 5 beşulduzlu hotellərin açılması, turist marşrutlarının təmir-bərpası, turizmin inkişafına təkan verən infrastrukturun təkmilləşdirilməsi, ilk ayını yaşadığımız bu ili ölkəmizin turizm sənayesi üçün xüsusi uğurlu edəcəkdir.

Bu məsuliyyətli vəzifələrin həyata keçirilməsində mədəniyyət və turizm naziri Əbülfəs Qarayevin diqqət və qayğısı hər zaman hiss edilməkdədir. Mədəniyyət və Turizm Nazirliyinin fəaliyyətinin 5 ilinin tamam olması münasibətilə başda cənab nazir olmaqla, nazirliyin bütün kollektivini təbrik edirəm, mədəniyyətimizin təbliği, ölkəmizin turizm sektorunun inkişafında yorulmaz fəaliyyətlərində onlara uğurlar arzulayıram.

Mədəniyyət.- 2011.- 28 yanvar.- S. 9.