Beş illik fəaliyyətin uğurlu yekunları

Yaradıcı insanların təbrikləri

İlham Rəhimli,

sənətşünaslıq doktoru, professor

Böyük zaman ölçüsündə beş il çox qısa tarixdir. Baxır bu beş ilə hansı ölçülərlə, hansı meyarlarla və hansı fəlsəfi dəyərlərlə baxırsan. Əsl mətləb, əsl məna, əsl dəyər məhz həmin baxış bucağının mahiyyətində öz dəyərini tapır. Məhz bu baxımdan yanaşanda Mədəniyyət və Turizm Nazirliyinin 5 ildə gördüyü işlərin dəyərini, miqyasını, əzəmətini daha dərindən duymaq olur.

Bəzi məqamları birlikdə xatırlayaq.

Bu beş ildə neçə-neçə sənət məbədi tamamilə yenidən qurularaq, çağdaş texnologiya ilə təmin edilərək xalqın ixtiyarına verilib.

Bu beş ildə Azərbaycanda neçə-neçə yeni sənət kollektivi, müxtəlif xarakterli yeni incəsənət ocağı yaranıb.

Bu beş ildə Azərbaycanda mədəniyyətə, incəsənətin müxtəlif növlərinə, turizmə həsr edilmiş neçə-neçə beynəlxalq konfrans reallaşıb.

Bu beş ildə başda UNESCO-nun iqamətgahı olmaqla, neçə-neçə ölkədə Azərbaycanın mədəniyyət günləri keçirilib.

Bu beş ildə Azərbaycanda müxtəlif xarakterli beynəlxalq müsabiqələr, beynəlxalq festivallar olub.

Bu beş ildə Azərbaycana son 55 ildəkindən çox əcnəbi turist gəlib...

Belə misalların sayını bir qədər də artıra bilərdim. Məsələ onda deyil. Sevindirici haldır ki, Mədəniyyət və Turizm Nazirliyinin kollektivi milli dövlətçilik ideyalarına mətanətlə söykənərək, xalqımızın mənəvi-əxlaqi dəyərlərini ülviyyətlə uca tutaraq, insanların mədəniyyət vasitəsilə kamilləşmə prosesinə əsaslanaraq ali məramları uğrunda yorulmadan, coşqun ehtirasla, dərin məhəbbətlə çalışırlar.

Dostlar! Məramınız həmişə nur saçsın.

Firəngiz Əlizadə,

Bəstəkarlar İttifaqının sədri, Xalq artisti, professor

Çağdaş zamanda hər bir ölkənin, onun tarixi-mədəni irsinin dünyada tanınması üçün mədəniyyətin, incəsənətin ayrı-ayrı sahələri ilə yanaşı, turizmin də geniş imkanları var. Ölkəyə gələn hər hansı əcnəbi qonaq həmin ölkənin mədəniyyətini də, təbii gözəlliklərini, istirahət mərkəzlərini də görüb qiymətləndirə bilir. Bu baxımdan mədəniyyətin inkişafında turizmin də böyük rolu var. Beş il əvvəl ölkə prezidentinin fərmanı ilə Azərbaycanda Mədəniyyət və Turizm Nazirliyinin yaradılması da bu iki mühüm sahənin inkişafına geniş zəmin yaratmış oldu. Beş il böyük zaman olmasa da, bu müddət ərzində Mədəniyyət və Turizm Nazirliyi bir çox böyük layihələr həyata keçirib. Nazirliyin bu və ya digər layihələrin reallaşması ilə bağlı respublikamızda fəaliyyət göstərən yaradıcı təşkilatlarla da sıx əlaqəsi var. Bu mənada Bəstəkarlar İttifaqının da Mədəniyyət və Turizm Nazirliyi ilə çox uğurlu əməkdaşlığı var.

Demək olar ki, bizim tədbirlərin hamısı Mədəniyyət və Turizm Nazirliyi ilə birgə keçirilir. Bəstəkarlarımızın, görkəmli musiqişünasların və ifaçıların yubileyləri, xatirə gecələri, yeni əsərlərin təqdimatı, konsert proqramları, bir sözlə, hər hansı bir tədbirimizdə nazirlik bizdən öz köməkliyini əsirgəmir. Buraya beynəlxalq tədbirləri də əlavə edə bilərik. Məsələn, 2009-cu ildə Heydər Əliyev Fondu ilə birgə keçirilən I Beynəlxalq Muğam Festivalının uğurla reallaşmasında Mədəniyyət və Turizm Nazirliyinin böyük köməyi olmuşdur. Bu il keçiriləcək II Beynəlxalq Muğam Festivalına da nazirliklə birgə hazırlaşırıq. Əminik ki, sıx əməkdaşlığımız bundan sonra da davam edəcək.

Mədəniyyət və Turizm Nazirliyinin yaranmasının 5 illiyi münasibətilə başda cənab nazir Əbülfəs Qarayev olmaqla nazirliyin bütün əməkdaşlarını öz təşkilatımız adından ürəkdən təbrik edir, onlara növbəti beşilliklərdə də yeni-yeni uğurlar arzulayırıq.

Anar,

Azərbaycan Yazıçılar Birliyinin sədri, Xalq yazıçısı

Mədəniyyət və Turizm Nazirliyi Azərbaycanda çox qədim ənənələri olan bir dövlət qurumudur. Son 5 ildə həm mədəniyyət, həm də turizm sahəsində çox böyük işlər görülüb. Azərbaycan Yazıçılar Birliyi də Mədəniyyət və Turizm Nazirliyi ilə həmişə sıx əlaqədə olub. Bu illər ərzində biz yazıçılarımızın yubiley tədbirlərini Bakıda, eləcə də xaricdə, Rusiyada, Türkiyə və başqa yerlərdə birgə keçirmişik. Hörmətli mədəniyyət və turizm naziri bizim tədbirlərimizdə fəal iştirak edir. Arzu edərdim ki, əməkdaşlığımız bundan sonra da davam etsin. Mədəniyyət və Turizm Nazirliyinin rəhbərliyinə və kollektivinə uğurlar diləyirəm.

Zəlimxan Yaqub,

Azərbaycan Aşıqlar Birliyinin sədri, Xalq şairi

Mədəniyyət və Turizm Nazirliyinin yaranmasından keçən 5 ildə mədəniyyətimizin bütün qolları yüksək səviyyədə inkişaf edib, daha da çiçəklənib. Millətin sevgisi ilə yanaşı, mədəniyyətimiz dövlətdən də daha çox qayğı və dəstək görüb. Son illərdə iqtisadi inkişafımıza uyğun olaraq ölkəmizdə turizm çox sürətlə inkişaf edir. Bu sahədə son beş ildə görülən işlər, əldə edilən uğurlar göz qabağındadır. Azərbaycanın bütün cənnət guşələrində turizmlə bağlı görülən məqsədyönlü işlərin nəticəsidir ki, xarici ölkələrdən respublikamıza turist axını ildən-ilə artır.

Muğamımızın, aşıq sənətinin, xalçaçılığın, Novruz bayramının xalqımızın milli-mənəvi sərvəti kimi dünya mədəniyyəti inciləri sırasında UNESSO-nun qeyri-maddi mədəni irs siyahısına salınmasında Azərbaycan Mədəniyyət və Turizm Nazirliyinin böyük rolu olub. Son illərdə həyata keçirilən möhtəşəm tədbirlər mədəniyyətimizə böyük töhfədir ki, bu da təkcə bu nazirliyin tarixi üçün yox, bütövlükdə mədəniyyətimizin tarixində böyük hadisədir.

Mən bir şeyi də xüsusi olaraq vurğulamaq istəyirəm ki, Mədəniyyət və Turizm Nazirliyi son illərdə aşıq sənətinə çox böyük diqqət və qayğı göstərir. Aşıq sənətinin UNESSO-nun qeyri-maddi mədəni irs siyahısına daxil edilməsi, 2010-cu ilin oktyabrında ölkəmizdə I Beynəlxalq Aşıq Festivalının keçirilməsi bunun bariz nümunəsidir. Eyni zamanda qeyd etmək istəyirəm ki, Azərbaycan Aşıqlar Birliyinin həyata keçirdiyi bütün tədbirlər həmişə bu nazirlik tərəfindən ən yüksək səviyyədə dəstəklənir, köməklik göstərilir.

Mədəniyyət və Turizm Nazirliyinin yaradılmasının 5 illiyi münasibəti ilə başda cənab nazir olmaqla, nazirliyin bütün əməkdaşlarını təbrik edir, onlara mədəniyyətimizin inkişafı naminə yorulmaz fəaliyyətlərində daha böyük uğurlar arzulayıram.

Azər Paşa Nemət,

Azərbaycan Teatr Xadimləri İttifaqının sədri, Xalq artisti:

Mədəniyyət və Turizm Nazirliyi yarandığı gündən çox böyük işlər, böyük layihələr həyata keçirib. Ötən beş il ərzində mədəniyyətimiz və incəsənətimizdə yadda qalan mədəniyyət hadisələrinin sayı kifayət qədər çoxdur. Bu illər ərzində çox maraqlı kitablar çap olunub, yeni filmlərin çəkilməsinə Mədəniyyət və Turizm Nazirliyi dəstək verib. İncəsənətə və xüsusi ilə teatr sahəsinə nəzər salsaq görərik ki, teatr haqqında qanunun qəbul olunması, teatr binalarının təmir edilməsi Azərbaycan teatrına olan böyük qayğı və diqqətdir.

Ötən il ölkəmizdə ilk dəfə I Bakı Beynəlxalq Teatr Konfransı keçirildi. Dünyanın tanınmış teatr xadimləri Azərbaycana gəldilər, milli teatrımızın bu günü ilə, teatr binalarımızla tanış oldular. Çexov adına Beynəlxalq Teatr Festivalının “İpək yolu” mərhələsinin Bakıda keçirilməsi də böyük bir mədəniyyət hadisəsi kimi yadda qaldı. Bunların hamısının həyata keçirilməsinin arxasında Mədəniyyət və Turizm Nazirliyinin böyük fəaliyyəti dayanır. Şəxsən cənab nazirin beş il ərzində gördüyü işləri, onun təşəbbüsü, rəhbərliyi ilə həyata keçirilən layihələri yüksək qiymətləndirirəm. Mədəniyyət və Turizm Nazirliyinin bütün məsul işçilərinin əməyini qeyd eləmək istərdim. Mən arzu eləyirəm ki, Mədəniyyət və Turizm Nazirliyi üzümüzə gələn beşillikdə daha çox uğurlar qazansın, ondan sonrakı beşillikdə daha böyük işlər görsün. Mədəniyyət və Turizm Nazirliyinə böyük uğurlar arzulayıram.

Mədəniyyət.- 2011.- 28 yanvar.- S. 7.