İstedadlar sorağında

 

   Azərbaycan dövləti yaradıcı gənclərə diqqət və qayğısını əsirgəmir

  

   Ölkəmizi beynəlxalq müsabiqə və festivallarda uğurla təmsil edən daha altı ifaçı Azərbaycan Respublikası Prezidentinin xüsusi təqaüdünə layiq görülüb

  

   Qloballaşmanın vüsət aldığı müasir dövrdə Azərbaycanda istedadlı yeniyetmə və gənclərin yaradıcılıq imkanlarının üzə çıxarılması, inkişaf etdirilməsi, onların müxtəlif beynəlxalq müsabiqə və festivallarda fəal iştirakını təmin etmək istiqamətində müxtəlif tədbirlər, maraqlı layihələr həyata keçirilir. Etiraf edək ki, istedadların üzə çıxarılması, onların cəmiyyətdə uğur qazanması üçün diqqət və qayğı vacib amildir. Azərbaycan dövləti bu sahədə yetişən nəslə hər zaman dəstək olur.

  

   Sənət yolunda ilk addımlarını atan istedadlı yeniyetmə və gənclər üçün xüsusi Prezident təqaüdünün təsis olunması da bunun bariz nümunəsidir. Dövlət başçısının 2012-ci il 29 mart tarixli sərəncamı ilə daha altı nəfər adları, Azərbaycanın gənc istedadlarının “Qızıl kitabı”na yazılmaqla, Azərbaycan Respublikası Prezidentinin xüsusi aylıq təqaüdünə layiq görülüblər. Bunlar Üzeyir Hacıbəyli adına Bakı Musiqi Akademiyası nəzdində Orta İxtisas Musiqi Məktəb-studiyasının şagirdləri Murad Abasov, Vüsalə Babayeva, Ənvər Kərimov, Bakı şəhər Leopold və Mstislav Rostropoviçlər adına 21 nömrəli Onbirillik Musiqi Məktəbinin şagirdləri Günay Ağalarova və Məhərrəm Hüseynli, Abşeron rayon Xırdalan şəhər Uşaq Musiqi Məktəbinin şagirdi Atabala Manafzadədir.

   Azərbaycan incəsənətini, musiqisini dünyaya tanıtmaqda ilk uğurlarını qazanmış bu gənclərlə oxucularımızı daha yaxından tanış etmək istərdik.

  

   * * *

  

   Leopold və Mstislav Rostropoviçlər adına 21 nömrəli Onbirillik Musiqi Məktəbi Bakı şəhərinin qabaqcıl təhsil müəssisələrindəndir. Prezident təqaüdünə layiq görülmüş Məhərrəm Hüseynli 2003-cü ildə Ə.Bədəlbəyli adına Musiqi Məktəbinə daxil olub. 2006-cı ildən Bakı Musiqi Akademiyasında dosent Svetlana Mirzəyeva-Əhmədovanın sinfində vokal dərsləri alır. 2009-cu ildən Leopold və Mstislav Rostropoviçlər adına 21 nömrəli Onbirillik Musiqi Məktəbində oxuyur. Həmin il S.Yesenin adına müsabiqə-festivalda qalib olub. İlk uğuru onu sevdiyi sənətə daha da bağlayıb. Dövlət Filarmoniyasında Rauf Abdullayevin rəhbərliyi altında Dövlət Simfonik Orkestrdə debütü də diqqəti cəlb edib.

   Bundan sonra Ukraynanın Odessa şəhərində keçirilən “Dəniz bürcü-günəş, gənclik, gözəllik” adlı X beynəlxalq festival-müsabiqədə uğur qazanıb: “Həmin müsabiqədə I mükafata layiq görüldüm. Bu yaxınlarda isə Moskvada Sergey Lyferkusun “Biz opera oxuyuruq” adlı V beynəlxalq müsabiqənin diplomantı oldum. Əlbəttə ki, bütün bu nailiyyətlər tək mənim zəhmətimin nəticəsi deyil. Buna görə ilk növbədə müəllimlərimə minnətdaram, mənim bu sənətdə bacarığımın üzə çıxarılmasında göstərdikləri dəstəyə görə onların hər birinə “çox sağ olun” deyirəm. Eyni zamanda biz gənclərin yaradıcılıq imkanlarının inkişafı üçün yaradılan şəraitə görə ölkə rəhbərliyinə dərin təşəkkürümü bildirirəm”.

  

   * * *

  

   Günay Ağalarova da Leopold və Mstislav Rostropoviçlər adına 21 nömrəli Onbirillik Musiqi Məktəbində təhsil alır. İlk musiqi təhsilinə fortepiano ixtisası üzrə Zaretta Çecemovanın sinfində başlayıb. Mədəniyyət və Turizm Nazirliyinin təşkilatçılığı ilə respublikada keçirilən müsabiqələrdə kiçik və böyük yaş qruplarında dəfələrlə fərqlənib. Beynəlxalq müsabiqələrdə uğurları az deyil. 2008-ci ildə Belarusun paytaxtı Minskdə keçirilən V Beynəlxalq Delfi Oyunlarında "Professionallıq" nominasiyası üzrə diplom alıb. 2010-cu ildə Litvanın Kaunas şəhərində gənc musiqiçilərin XIX beynəlxalq festivalında Azərbaycanı təmsil edərək Kaunas Simfonik Orkestri ilə birgə və solo ifalarla çıxış edib. Ötən il İtaliyanın Bari şəhərində keçirilən Pyetro Argento adına Beynəlxalq Musiqi Müsabiqəsində I yerə layiq görülüb. Bu ilin əvvəllərində isə Çexiyanin Pilzen şəhərində keçirilən B.Smetana adına beynəlxalq piano müsabiqəsinin diplomantı olub: “Prezident təqaüdünə layiq görüldüyümü, adımın gənc istedadların «Qızıl kitabı»na düşdüyünü eşidəndə hədsiz dərəcədə sevindim. Mənə göstərilən diqqətə, qayğıya bundan sonra da layiq olmağa çalışacağam. Çalışacağam ki, beynəlxalq müsabiqələrdə Azərbaycanı uğurla təmsil edim. Sənət yolunda əldə etdiyim uğurlara görə müəllimlərimə minnətdaram”.

  

   * * *

  

   Üzeyir Hacıbəyli adına Bakı Musiqi Akademiyası nəzdində Orta İxtisas Musiqi Məktəb-studiyasında təhsil alan Vüsalə Babayeva 1997-ci ildə Bakıda doğulub. Musiqiyə uşaqlıqdan həvəs göstərib: “Valideynlərim məndə olan marağı görüb məni musiqi məktəbinə yazdırdılar. Altı yaşım olanda Üzeyir Hacıbəyli adına Bakı Musiqi Akademiyası nəzdində Orta İxtisas Musiqi Məktəb-studiyasında Ayişə Əliyevanın fortepiano sinfinə qəbul olundum. Hazırda məktəbin 9-cu sinfində təhsil alıram. Adımın gənc istedadların «Qızıl kitabı»na düşməsini eşidəndə çox sevindim. İnanıram ki, öz üzərimdə daha məsuliyyətlə çalışıb yeni uğurlar əldə edəcəyəm”.

   V.Babayeva ilk uğurunu 2006-cı ildə qazanıb, “Məktəb-studiya-25” Uşaq Musiqi Festivalında II yer tutaraq laureat adına layiq görülüb. 2007-ci ildə Qara Qarayev adına gənc pianoçuların IV Bakı Musiqi Festivalında 3-cü, 2008-ci ildə Qara Qarayevin anadan olmasının 90 illiyinə həsr olunmuş “Gənc musiqiçilər təhlil və ifa edir” I Respublika elmi-ifaçılıq müsabiqəsində 2-ci, 2010-cu ildə Qara Qarayev adına pianoçuların I beynəlxalq elmi-ifaçılıq müsabiqəsində 2-ci yeri tutub. Hələlik ən böyük nailiyyətini isə ötən il Bolqarıstanın Dobriç-Albena şəhərində keçirilən “Ümidlər. İstedadlar. Sənətkarlar” XVI beynəlxalq müsabiqəsində qazanıb, orada I mükafatla təltif olunub: “Ölkəmiz adına qələbə əldə etmək çox gözəl hisslərdir. Yenidən bu duyğuları yaşamaq istərdim”.   

 

   * * *

  

   Murad Abasov 2004-cü ildən Üzeyir Hacıbəyli adına Bakı Musiqi Akademiyası nəzdində Orta İxtisas Musiqi Məktəb-studiyasında Ayişə Əliyevanın sinfində təhsil alır. Hazırda 8-ci sinif şagirdi olan Murad 2006-cı ildə “Məktəb-studiya-25” Uşaq Musiqi Festivalında (II yer), 2007-ci ildə Qara Qarayev adına gənc pianoçuların IV Bakı Musiqi Festivalında (II yer), 2008-ci ildə Qara Qarayevin anadan olmasının 90 illiyinə həsr olunmuş “Gənc musiqiçilər təhlil və ifa edir” I Respublika elmi-ifaçılıq müsabiqəsində (II yer), 2010-cu ildə Qara Qarayev adına pianoçuların I beynəlxalq elmi-ifaçılıq müsabiqəsində (I yer) ifaları ilə fərqlənib.

   Bundan əlavə, P.İ.Çaykovski adına Moskva Dövlət Konservatoriyasının medalı və UNESCO tərəfindən verilmiş xüsusi diploma da layiq görülüb. Gənc istedad deyir ki, adının gənc istedadların «Qızıl kitabı»na düşməsinə və Prezidentin xüsusi aylıq təqaüdünə layiq olunmasına görə çox sevinir. İnanır ki, bundan ruhlanaq daha böyük uğurlar əldə edəcək.

  

   * * *

  

   Üzeyir Hacıbəyli adına Bakı Musiqi Akademiyası nəzdində Orta İxtisas Musiqi Məktəb-studiyasının daha bir şagirdi Ənvər Kərimov 2007-ci ildə truba ixtisası üzrə Əməkdar artist Vladislav Kuznesovun sinfinə daxil olub. Ötən dövrdə dəfələrlə konsert proqramı ilə çıxış edib: “2011-ci ildə Bakıda keçirilən nəfəs və zərb alətləri ifaçılarının II Respublika müsabiqəsində laureat adına layiq görülmüşəm. Həmin ilin noyabr ayında Bolqarıstanın Stara Zaqora şəhərində keçirilən VI beynəlxalq müsabiqədə I yeri qazandım. Ölkə başçısının sərəncamı ilə adımın Azərbaycanın gənc istedadlarının “Qızıl kitabı”na daxil edildiyini və Prezident təqaüdünə layiq görüldüyümü eşidəndə sevincimin həddi-hüdudu yox idi. Sevinirəm ki, məktəbdə təhsil aldığım illər hədər getməyib. Ölkə başçımıza, müəllimlərimə minnətdarlığımı bildirirəm. Bundan sonra da mənə göstərilən etimadı doğrultmağa çalışacağam”.

  

   * * *

  

   Abşeron rayon Xırdalan şəhər Uşaq Musiqi Məktəbinin VII sinif şagirdi Atabala Manafzadə müxtəlif festival və müsabiqələrdə uğur qazanıb. Gənc pianoçuların respublika müsabiqəsində, ötən ilin noyabr-dekabr aylarında “İstedadlı uşaqlar” respublika müsabiqəsində, Bakı Musiqi Akademiyasının təşkilatçılığı ilə F.Listin anadan olmasının 200 illik yubileyi münasibətilə keçirilən festival-müsabiqədə, Polşanın Azərbaycandakı səfirliyi və Azərbaycan Mədəniyyət və Turizm Nazirliyinin birgə təşkilatçılığı ilə gerçəkləşən “Şopen-200” müsabiqəsində qalib olub. 2011-ci ildə V.Spivakov Xeyriyyə Fondunun təşkilatçılığı ilə keçirilən “Moskva dostları qarşılayır” VIII beynəlxalq festivalda iştirak edib. Həmçinin Mədəniyyət və Turizm Nazirliyinin təşkilatçılığı ilə MDB ölkələrinin I Uşaq Musiqi Akademiyasında konsertin və ustad dərslərinin iştirakçısı olub. Bu ilin fevralında Serbiyada keçirilən Davorin Jenko adına IX beynəlxalq musiqi müsabiqəsində Atabala Manafzadə müsabiqə tarixində ilk dəfə olaraq iki yaş qrupunda mübarizə apararaq müsabiqənin baş mükafatına layiq görülüb.

   Yeniyetmə ifaçı bundan sonra da ölkəmizi beynəlxalq musiqi tədbirlərində layiqincə təmsil etmək arzusundadır: “Mədəniyyət və Turizm Nazirliyinin dəstəyi ilə yüzlərlə gənc kimi mən də bir sıra müsabiqə və festivallara qatılmışam. Əldə etdiyim uğurlara görə müəllimlərimə, valideynlərimə çox minnətdaram. İlk müəllimim İradə Bağırovaya, həmçinin Kamilla Əmirovaya təşəkkür edirəm. Ölkə başçısının sərəncamı ilə adımın Azərbaycanın gənc istedadlarının “Qızıl kitabı”na yazılması və Prezident təqaüdünə layiq görülməyim həm də onların uğurudur. Bundan sonra da çalışacağam ki, onları yeni nailiyyətlərimlə sevindirim”.

  

 

   Ceyhun Zərbəliyev

 

  Mədəniyyət.- 2012.- 4 aprel.- S. 8.