Beynəlxalq Uşaq Kitabı Günü qeyd olundu

 

Aprelin 2-də Firudin Köçərli adına Respublika Uşaq Kitabxanasında Beynəlxalq Uşaq Kitabı Gününə həsr olunmuş tədbir keçirildi. Tədbiri giriş sözü ilə kitabxananın direktoru Fizurə Quliyeva açaraq, bu günün tarixindən danışdı. Qeyd olundu ki, Beynəlxalq Uşaq Kitabı Günü görkəmli Danimarka nağılçısı Hans Kristian Andersenin anadan olmasının 200 illiyi münasibətilə 1967-ci ildən qeyd olunur: Beynəlxalq Uşaq Kitabı Şurasının təsis etdiyi bu günü hər il dünyanın müxtəlif ölkələrində uşaq müəssisələri, kitabxanalar qeyd edirlər. Biz də bu günü hər il qeyd edirik. Onu da bildirim ki, bu il biz Beynəlxalq Uşaq Kitabı Şurasına üzv olmuşuq. Bu, çox böyük bir təşkilatdır. Təşkilat uşaq yazıçılarını, şairləri, nasirləri, uşaq rəssamlarını təbliğ etməyi qarşısına məqsəd qoyub. Şuraya üzv olmaqda biz də bu işə töhfə vermək istəyirik.

Tədbir çərçivəsində Milli Uşaq Kitabı Sərgisinin açılışı oldu. Kitabxananın direktor müavini Zahirə Dadaşova bildirdi ki, sərginin təşkilində məqsəd uşaqları ölkəmizdə çap olunan yeni uşaq ədəbiyyatı ilə tanış etməkdir: İstəyirik ki, ictimaiyyətin diqqətini kitaba yönəldək. Uşaqlar, valideynlər sərgiyə gəldikləri zaman tək kitablarla deyil, onların müəllifləri ilə də tanış olurlar.

Sərgidə müxtəlif mövzularda - Nağıllar aləmində, Azərbaycan - muğam dünyasına səyahət, Xalq yaradıcılığı paytaxtları-2012, Tarix - keçmişdən gələcəyə, Yeddi rəngli kəmərim, Sənin maraq dünyans. mövzularda kitablar nümayiş olunur.

Uşaq yazıçılarından Sevinc Nuruqızı, Gülzar İbrahimova, Zahid Xəlil, Oqtay Rza və digərlərinin iştirak etdiyi tədbirdə daha sonra məktəblilər milli rəqslər, kitaba həsr olunmuş şeirlər təqdim etdilər. Uşaqlar arasında viktorina keçirildi. Sərgi iştirakçılarına kitabxananın təsis etdiyi Göy qurşağı jurnalı hədiyyə edildi.

Uşaq kitabı sərgisi aprelin 7-dək davam edəcək.

 

Gülər

 

Mədəniyyət.- 2012.- 4 aprel.- S. 5.