“Pal küçəsinin oğlanları”

Ramil Səfərovun macar dilindən tərcümə etdiyi kitabın növbəti təqdimatı

Macarıstanda məhbəs həyatı yaşayan Azərbaycan Silahlı Qüvvələrinin zabiti Ramil Səfərovun macar dilindən tərcümə etdiyi Ferens Molnarın “Pal küçəsinin oğlanları” kitabının növbəti təqdimat mərasimi keçirildi. 2004-cü ildə Budapeşt şəhərində NATO kurslarında olarkən Azərbaycan bayrağını təhqir etmiş erməni hərbçini öldürməkdə ittiham olunaraq həbs edilən zabitimiz 2006-cı ildə ömürlük həbsə məhkum edilib. “Pal küçəsinin oğlanları” hərbçinin məhbəsdə macar dilindən tərcümə etdiyi ikinci kitabdır. Bundan öncə tanınmış macar yazıçısı Maqda Sabonun “Qapı” romanı Ramil Səfərovun tərcüməsində işıq üzü görmüşdü.

“Pal küçəsinin oğlanları”nın Azərbaycan dilində nəşrinin ilk təqdimatı ötən ilin dekabrında keçirilmişdi. “Ozan”nəşriyyatında işıq üzü görən kitabın redaktoru filologiya üzrə fəlsəfə doktoru dosent Asif Rüstəmlidir. Kitabın nəşr edilməsində isə “Azərbaycan bayrağı” ordenli xeyriyyəçi Şahid Həbibullanın xüsusi köməyi olub.

Aprelin 14-də Gənclərə Yardım Fondunda gerçəkləşən budəfəki təqdimatın təşkilatçıları “AzeBookNet” şəbəkəsi və “İdea Youth Club” idi. Təqdimatda “AzeBookNet” şəbəkəsinin həmtəsisçisi Aynur Zərrintac, “İdea Youth Club”un təmsilçisi Şəfiqə Fərzəliyeva, kitabın redaktoru Asif Rüstəmli, Ramil Səfərovun atası Sahib Səfərov, ramilsafarov.com saytının nümayəndəsi Şəbnəm Gülməmmədova və başqaları çıxış etdilər.

Tədbir zamanı Ramil Səfərovla canlı telefon bağlantısı da yaradıldı. O, tədbir iştirakçılarını salamladı və təşkilatçılara təşəkkürünü bildirdi: “Çox şadam ki, bu gün azərbaycanlı oxucular macar yazıçısının bu maraqlı əsərini öz doğma dilimizdə oxuyaraq faydalanacaqlar. Sizə işlərinizdə uğurlar, cansağlığı arzulayıram”.

R.Səfərov kitabı Azərbaycanın Milli Qəhrəmanı Mübariz İbrahimovun, "İgidliyə görə" medalı ilə təltif edilən Əhməd Abdullayevin, Fərid Əhmədovun, eləcə də Qarabağ savaşında həlak olan bütün şəhidlərin xatirəsinə ithaf edib. O, ümid etdiyini bildirib ki, kitab bir çox müştərək dəyərlərə malik olan macar və Azərbaycan xalqlarının bir-birini daha yaxından tanıması istiqamətində atılan addımlara kiçik bir töhfə olacaq.

Qeyd edək ki, görkəmli macar yazıçısı F.Molnarın "Pal küçəsinin oğlanları" kitabı müxtəlif nəsillərdən olan macar oxucularının masaüstü kitabıdır. Qəhrəmanlıq və vətənpərvərliyi təbliğ edən kitab 20 dilə tərcümə edilib, müxtəlif ölkələrdə dəfələrlə nəşr olunub. Əsərin ssenarisi əsasında bir neçə film çəkilib.

Günel Əliyeva,

Mədəniyyət və İncəsənət

Universitetinin tələbəsi

Mədəniyyət.- 2012.- 18 aprel.- S. 15.