İtaliyada Azərbaycan Mədəniyyəti Günləri davam edir

Xəbər verdiyimiz kimi, aprelin 16-da Heydər Əliyev Fondunun və Azərbaycanın Romadakı səfirliyinin dəstəyi, Mədəniyyət və Turizm Nazirliyinin təşkilatçılığı ilə İtaliyada Azərbaycan Mədəniyyəti Günləri başlayıb. Mədəniyyəti günlərinə aprelin 16-da Turin şəhərinin möhtəşəm “Kariniano” teatrında keçirilən konsertlə start verilib.

Tədbirin açılışında İtaliyanın Piemonte regionunun mədəniyyət məsələləri üzrə müşaviri Mikele Kapola və Azərbaycanın mədəniyyət və turizm nazirinin müavini Ədalət Vəliyev çıxış edərək, İtaliya ilə Azərbaycanın bütün sahələrdə gözəl əlaqələrə malik olduqlarını vurğulayıblar. Qeyd olunub ki, Azərbaycan mədəniyyəti günləri bu əlaqələrə yeni töhfə verəcək.

Mərasimdə Xalq artisti Afaq Məlikovanın rəhbərlik etdiyi Azərbaycan Dövlət Rəqs Ansamblı, Əməkdar artist Elnarə Kərimovanın başçılıq etdiyi “Buta” kamera xoru və digər sənətçilərimiz maraqlı konsert proqramı ilə çıxış ediblər. Konsertin çox gözəl keçdiyini qeyd edən İtaliya-Azərbaycan parlamentlərarası dostluq qrupunun rəhbəri xanım Rossana Boldi sənətçilərimizin ifasından məmnunluğunu bildirib. O, Azərbaycan Prezidenti İlham Əliyevin və Heydər Əliyev Fondunun prezidenti Mehriban xanım Əliyevanın mədəniyyətə və sosial həyata göstərdikləri dəstəyin İtaliyada yüksək qiymətləndirildiyini vurğulayıb. İtaliyanın Piemonte regionunun mədəniyyət məsələləri üzrə müşaviri Mikele Kapola Azərbaycan Mədəniyyəti Günlərində iştirakından məmnunluq ifadə edib. M.Kapola vurğulayıb ki, Azərbaycan zəngin mədəniyyətə malik olan ölkədir.

Növbəti konsert proqramı aprelin 17-də Venesiyanın Malibran Teatrında keçirilib. Aprelin 19-da isə incəsənət ustalarımız Milan şəhərində, Cüzeppe Verdi Konservatoriyasının konsert zalında çıxış ediblər. Dövlət Rəqs Ansamblı, “Buta” kamera xoru, “Natiq” ritm qrupu, klassik musiqi və muğam ifaçılarının çıxışları alqışlarla qarşılanıb.

Mədəniyyət günləri çərçivəsində son konsert aprelin 21-də paytaxt Romanın ən iri konsert kompleksi olan “Auditorium” musiqi parkının Sinopoli zalında keçiriləcək.

Ölkəmizin zəngin tarix və mədəniyyətinin italyan ictimaiyyətinə geniş şəkildə təqdim edilməsi məqsədilə mədəniyyət günləri çərçivəsində Roma şəhərində, həmçinin digər təqdimat və tədbirlər nəzərdə tutulub.

Mədəniyyət.- 2012.- 20 aprel.- S. 2.