“Azərbaycan Bəstəkarlar İttifaqı: böyük yolun tarixi”

Aprelin 24-də Azərbaycan Bəstəkarlar İttifaqında qurumun tarixini əks etdirən kitabın təqdimatı keçirildi. Kitabın müəllifi və tərtibatçısı sənətşünaslıq namizədi Lalə Hüseynovadır. Kitabda Bəstəkarlar İttifaqının 75 illik tarixi əksini tapıb, çoxsaylı arxiv sənədlərindən, mətbuatda dərc olunan materiallardan, fotoxronikalardan istifadə edilib.

Təqdimatda çıxış edən müəllif kitabın ərsəyə gəlməsində göstərdiyi köməkliyə görə Mədəniyyət və Turizm Nazirliyinə, Bəstəkarlar İttifaqına, S.Mümtaz adına Ədəbiyyat və İncəsənət Arxivinin, Musiqi Mədəniyyət Dövlət Muzeyinin, Ü.Hacıbəylinin ev-muzeyinin əməkdaşlarına təşəkkürünü bildirdi: “Bəstəkarlar İttifaqının tarixi elə Azərbaycan bəstəkarlıq məktəbinin tarixidir. Uzun illərdir biz bu kitabın üzərində işləyirdik, materialları axtarıb arayırdıq. Kitabda ittifaqın qurultayları, keçirdiyi tədbirlər haqqında da geniş məlumatlar yer alıb. Zəngin fotoxronikanın yalnız bir hissəsindən istifadə edə bildik. Materiallar bir kitaba sığan deyil. Ona görə də çalışacağıq ki, bu işin davamı olsun”.

Tədbirdə iştirak edən tanınmış musiqi xadimləri, elm və sənət adamları kitabın əhəmiyyətini vurğuladılar. Bəstəkarlar İttifaqının sədri, Xalq artisti, professor Firəngiz Əlizadə, ittifaqın katibləri - Xalq artisti, professor Ramiz Zöhrabov, Əməkdar incəsənət xadimi Eldar Mansurov, habelə Xalq artisti, tarzən Ramiz Quliyev, Yazıçılar Birliyinin katibi Rəşad Məcid və başqaları çıxış etdilər. Qeyd olundu ki, kitab dahi musiqiçilərimizin keçdiyi yola nəzər salır, Azərbaycan mədəni həyatını, musiqi tarixini təhlil edir.

Lalə Azəri

Mədəniyyət.- 2012.- 26 aprel.- S. 3.