Mədəniyyət və turizm naziri redaksiyamızın qonağı oldu

 

Mədəniyyət və turizm sahəsində fəaliyyət göstərən mətbu orqanlar hər zaman diqqətimizdədir

Ölkəmizin mədəniyyətinin, incəsənətinin, turizm imkanlarının təbliği, bu sahədə görülən işlərin cəmiyyətə çatdırılmasında kütləvi informasiya vasitələrinin müstəsna rolu var. Mədəniyyət və turizm naziri Əbülfəs Qarayev bu fikri dünən Dövlət Film Fondunun binasında, Mədəniyyət qəzeti redaksiyasının kollektivi ilə görüşündə dedi.

Redaksiyada əməkdaşların iş şəraiti ilə tanış olan nazir qəzetin işgüzar, yaradıcı kollektivinin formalaşmasından məmnunluğunu bildirdi, ölkəmizin mədəni həyatının, turizm sektorunun fəaliyyətinin, baş verən yeniliklərin, həyata keçirilən tədbirlərin qəzetin səhifələrində dolğun şəkildə işıqlandırıldığını dedi: Nazirliyin işçiləri ilə yanaşı, mədəniyyət sahəsinin təmsilçiləri, eləcə də mədəniyyətə yaxın, onunla maraqlanan dairələrdə də qəzet maraqla oxunur. Qəzetdə çap olunan, marağa, müzakirəyə səbəb olan yazılarla bağlı xoş sözlər eşidirəm. Bununla yanaşı, qəzetin daha da rəngarəng olmasına, səhifələrində zəngin materiallara yer verilməsinə, mədəniyyətin çoxşaxəli istiqamətlərinin işıqlandırılmasına, onun dərindən təhlilinə, mütəxəssislərin rəylərinə əsaslanaraq araşdırılmasına çalışmalıyıq. Ümumiyyətlə, mədəniyyət və turizm sahəsində fəaliyyət göstərən mətbu orqanların işi hər zaman diqqətimizdədir. Onların fəaliyyətinin genişləndirilməsi, mədəniyyət və turizm sahəsinin kütləvi informasiya vasitələrində dolğun, əhatəli şəkildə əks olunması hər zaman bizim üçün prioritet məsələdir.

Nazir sonda qəzetimizin kollektivinə, bütün əməkdaşlara fəaliyyətlərində uğurlar arzuladı.

 

 

Mədəniyyət.- 2012.- 25 aprel.- S. 2.