Maestro Niyazinin xatirə günü qeyd edildi

Avqustun 1-də Musiqi Mədəniyyəti Dövlət Muzeyinin Klassik Musiqi Həvəskarları Klubunda görkəmli dirijor və bəstəkar, SSRİ Xalq artisti Niyazinin xatirə gününə həsr olunmuş tədbir keçirildi.

Muzeyin direktoru Alla Bayramova tədbirdən öncə jurnalistlərə müsahibəsində musiqi mədəniyyətimizin inkişafından söz açdı: “Uğurlu mədəniyyət siyasətinin nəticəsi kimi Azərbaycan musiqisi bu gün özünün böyük inkişaf yolunu keçir. Bu musiqinin təməlini professional musiqi mədəniyyəti və bəstəkarlıq məktəbinin keşiyində duran korifeylər qoymuşlar. Belə insanlardan biri də maestro Niyazidir. Həmişə olduğu kimi, bu gün də biz Niyazinin irsini təbliğ edir və xatirəsini əziz tuturuq”.

Tədbiri açan Niyazinin mənzil-muzeyinin direktoru Rza Bayramov qonaqları salamladıqdan sonra çıxış üçün sözü muzeyin elmi işçisi Xanım Abdinovaya verdi. O, maestronun həyat və yaradıcılığı haqqında ətraflı danışdı. Çıxışlar muzeyin materialları əsasında hazırlanmış slaydlarla müşayiət olunurdu. Ü.Hacıbəyli adına Bakı Musiqi Akademiyasının dosenti, Əməkdar incəsənət xadimi, pianoçu Ülviyyə Hacıbəyovanın ifasında Niyazinin “Adajio” və “Arzu” əsərləri səsləndikdən sonra şair Fəxrəddin Meydanlı dirijora həsr etdiyi şeirini söylədi.

Niyazinin dirijorluq etdiyi konsertlərdən videogörüntülərin, kinofilmlərə bəstələdiyi musiqilərin nümayişi də sənətkar haqqında xoş xatirələri bir daha yada saldı. Tədbirdə klassik musiqi həvəskarları, tanınmış musiqiçilər və KİV nümayəndələri iştirak edirdilər.

Lalə Azəri

Mədəniyyət.- 2012.- 3 avqust.- S. 5.