Azərbaycan-Mərakeş mədəni əlaqələri ölkələrimizin dostluğuna töhfədir

Gələn il Mərakeşdə Azərbaycan Mədəniyyəti Günlərinin keçirilməsi nəzərdə tutulur.

Bu barədə bizimlə söhbətində Mərakeş Krallığının ölkəmizdəki fövqəladə və səlahiyyətli səfiri Həsən Hami məlumat verdi. Səfir bildirdi ki, bu, Azərbaycanın mədəniyyət və incəsənət nümayəndələrinin Mərakeşə ikinci səfəri olacaq: “Artıq Azərbaycanda Mərakeşin də iki dəfə belə böyük tədbiri keçirilib. Eyni zamanda Mərakeşdə Azərbaycan Mədəniyyəti Günləri gerçəkləşib. Bu cür səfərlər xalqlarımızın bir-birini daha yaxşı tanımasına, ölkələrimizin yaxınlaşmasına, dostluğuna töhfədir”.

Diplomat onu da vurğuladı ki, Bakıda çalışdığı üç il yarım ərzində ölkələrimiz arasında çoxsaylı qarşılıqlı səfərlər həyata keçirilib. Turizm, energetika, kənd təsərrüfatı, informasiya və kommunikasiya texnologiyaları, nəqliyyat, ədliyyə, səhiyyə əməkdaşlıq üçün perspektivli sahələrdir. Səfir yaxın vaxtlarda iki ölkə arasındakı diplomatik münasibətlərin yaradılmasının 20 illiyinin qeyd olunacağını dedi.

1960-cı ildən bəri ölkəsinin keçdiyi böyük inkişaf yolundan da bəhs edən diplomat bildirdi ki, Mərakeş yerləşdiyi regionda və dünyada sülh və həmrəyliyin bərqərar olmasına çalışır: “Biz firavanlıq və tərəqqiyə nail olmaq istiqamətində inam və məsuliyyətlə yolumuzu davam etdiririk, bunlar dünyada sabitlik və sülh üçün sağlam komponentlərdir”.

İ.Əsədova

Mədəniyyət.- 2012.- 8 avqust.- S. 4.