Cəlilabadda atəşpərəstlik abidəsi tapılıb

Cəlilabad rayonunun Seyidbazar kəndində Qaraağaclı bulaq adlanan təpədə atəşpərəstliklə bağlı yeni maddi-mədəniyyət nümunələri aşkar edilib.

Arxeoloji qazıntılar zamanı 20 kvadratmetr ərazini əhatə edən yerdə aşkar edilən sənduqə tipli beş qəbirin üzərində insanların astroloji inamları - günəş, ulduz təsvirləri əks olunub.

Arxeologiya və Etnoqrafiya İnstitutunun əməkdaşı Abuzər Ələkbərovun bildirdiyinə görə, yeni tapıntılar erkən orta əsrlər dövrünə - III-V əsrlərə aiddir.

A.Ələkbərov qeyd edib ki, qəbirlərin üstündə atəşpərəstlik inanclarının əlamətləri müşahidə olunur. Qəbirlərdə meyitlərin yandırılaraq basdırılması bunu deməyə əsas verir. Arxeologiya və Etnoqrafiya İnstitutunun ekspedisiyası ərazidə tədqiqat işlərini davam etdirəcək.

Mədəniyyət.- 2012.- 10 avqust.- S. 2.