“Xəmsə”nin tacik dilində yenidən nəşri müzakirə edilib

Böyük Azərbaycan şairi Nizami Gəncəvinin 870 illik yubileyində Tacikistandan geniş tərkibdə nümayəndə heyəti iştirak edəcək.

Bu barədə Azərbaycanın Düşənbədəki səfiri Abbasəli Həsənovun Tacikistanın mədəniyyət naziri Mirzaşoxrux Asrari ilə görüşündə məlumat verilib. Səfir sentyabrın sonunda Bakıda keçiriləcək yubiley tədbirinə Tacikistandan da nümayəndə heyətinin dəvət olunduğunu deyib. Görüşdə Nizami Gəncəvinin “Xəmsə”sinin tacik dilində yenidən nəşr olunmasının vacibliyinə də toxunulub. Nazir M.Asrari dəvətə görə minnətdarlığını bildirərək Tacikistandan geniş tərkibdə nümayəndə heyətinin bu tədbirə qatılacağını vurğulayıb.

Nazir qeyd edib ki, bu ilin oktyabrında Düşənbədə “Fələk” musiqi festivalı keçiriləcək. Festivalda Azərbaycanın muğam ustalarının iştirakı məsələsi də görüşdə müzakirə edilib. Səfir həmçinin Azərbaycanın Gəncə və Tacikistanın Xocənd şəhərlərinin “Qardaşlaşmış şəhərlər” elan olunması barədə təklifi də diqqətə çatdırıb.

Mədəniyyət.- 2012.- 15 avqust.- S. 2.