“Azərbaycan günü”

İslamın ən şəfqətli və müqəddəs Ramazan ayı münasibətilə Misirin paytaxtı Qahirədə “Azərbaycan günü” keçirilib. Misirin ictimai-siyasi, elm və mədəniyyət xadimlərinin, işgüzar dairələrin nümayəndələrinin iştirakı ilə keçirilmiş tədbirdə ölkəmizin Misirdəki səfiri Şahin Abdullayev və İSESCO-nun rabitə və ictimaiyyətlə əlaqələr üzrə eksperti Salah Əlcəfəravi çıxış ediblər.

Müstəqillik tariximizdən, Şərqin ilk demokratik respublikası olan Azərbaycan Xalq Cümhuriyyətindən söz açan səfir 1991-ci ildə dövlət müstəqilliyinin bərpasından sonra Azərbaycanın üzləşdiyi problemlər, Ermənistanın hərbi təcavüzünə məruz qalması, belə bir çətin vəziyyətdə ulu öndər Heydər Əliyevin siyasi hakimiyyətə qayıdışı və Azərbaycanın müasir tarixində yeni bir mərhələnin başlanması haqqında ətraflı məlumat verib.

İSESCO-nun eksperti S.Əlcəfəravi çıxışında Azərbaycanın tarixən İslam mədəniyyətinin inkişafında mühüm rol oynadığını vurğulayaraq, Ermənistanın işğal olunmuş ərazilərdə İslam mədəniyyət abidələrini məhv etməsindən danışıb.

Tədbirdə Azərbaycanın müstəqillik və inkişaf yolunu əks etdirən sənədli film nümayiş etdirilib. Azərbaycanın mədəniyyətini və incəsənətini əks etdirən əyani vasitələr, kitablar və jurnallar, xüsusilə nəfis tərtibatda və ərəb dilində çap edilmiş “İrs” jurnalı iştirakçılar tərəfindən xüsusi maraqla qarşılanıb.

Mədəniyyət.- 2012.- 15 avqust.- S. 4.