Dağ simfoniyası

 

Euronews telekanalında Qəbələ musiqi festivalı haqqında reportaj yayımlanıb

Xəbər verdiyimiz kimi, iyulun 24-dən avqustun 5-dək Heydər Əliyev Fondunun təşəbbüsü rəhbərliyi ilə Qəbələdə IV Beynəlxalq Musiqi Festivalı keçirilib.

Dünyanın tanınmış kollektivlərinin, solist, dirijor vokalçıların yer aldığı festival geniş rezonans doğurub. Euronews telekanalında festivalla bağlı yayımlanan reportaj da bunu təsdiq edir.

Qəbələ - dağ simfoniyası adlı reportajda deyilir: Klassik musiqi darısqal salonların çərçivəsindən kənara çıxmışdır. Bu il yayda Azərbaycanın kiçik Qəbələ şəhərinin sakinləri elə konsertlərə tamaşa etmişlər ki, hətta ən yüksək zövqlü tamaşaçılar bu barədə yalnız arzu edə bilərlər.

Xüsusi qeyd edilir ki, festivala dünya şöhrətli virtuozların böyük bir dəstəsi toplaşmışdı.

Qəbələ festivalının bədii rəhbəri Dmitri Yablonski deyir: Bizim konsertlərdə ömründə heç vaxt klassik musiqi eşitməmiş yeni tamaşaçılar çox olur. Lakin bu, olduqca xoşagələn haldır. Məşhur bəstəkarlardan birinin dediyi kimi, əgər konsertin müəyyən hissəsindən sonra heç olmasa bir nəfər çəpik çalırsa, mən çox sevinirəm, ona görə ki, biz daha bir tamaşaçı qazanmışıq.

Euronews telekanalının müxbiri söyləyir ki, Qəbələdə violonçelçalan Yablonskinin rəhbərliyi altında həm klassik musiqini öyrənir, həm yeni peşə mənimsəyirlər. Dörd il əvvəl Qəbələ şəhərində pianino fabriki açılmışdır. Həmin fabrikin əsası 100 il bundan əvvəl hollandiyalı Yohan Beltman tərəfindən qoyulmuşdur. Beltmanın nəticəsi Hans ulu babasının işini davam etdirir. O, həmin fabriklə bərabər Qəbələyə köçmüşdür.

Beltmanın pianino fabrikinin baş dizayneri Hans Leferink deyir: Mən konsertlərdə hədsiz həyəcan keçirirəm, çünki bu aləti hazırlayanda onun bütün müsbət cəhətlərini çox yaxşı bilirsən, amma onun bütün kiçik qüsurları da sənə məlum olur. Belə alət sənə öz uşağın qədər əziz olur.

Reportajda xüsusi vurğulanır ki, hazırda dünyada ən məşhur virtuoz pianoçulardan biri olan Boris Berezovski Qəbələyə əvvəllər gəlmişdir. Sənətçi etiraf edir ki, onu ən çox ruhlandıran yerli sakinlərin qonaqpərvərliyidir. O deyir: Ən çətin məsələ buradan getməkdir, ona görə ki, heç getmək istəmirsən. Bir nəfərlə söhbət edirsən, o isə dərhal sənə bir şüşə şərab bağışlayır, hətta öz evinə qonaq çağırır. Heç bir başqa yerdə belə qonaqpərvərlik görməzsiniz.

Euronews telekanalının müxbiri ənənəvi Azərbaycan musiqisi - muğam barədə söhbət açır. O deyir: Peşəkar ifaçı olmaq üçün onilliklər boyu oxumaq, öyrənmək lazımdır. Tarixdə məlum olan bütün repertuarı öyrənib yadda saxlamaq ən başlıcası, improvizə etməyi bacarmaq lazımdır.

Telekanal qeyd edir ki, London Kral Filarmonik Orkestrinin çıxışı Qəbələ festivalının final akkordu olmuşdur.

 

 

Mədəniyyət.- 2012.- 29 avqust.- S. 2.