Yeniyetmə
ifaçı beynəlxalq festivalda uğurla çıxış edib
Bakı şəhəri
G.Şaroyev adına 35 saylı 11 illik musiqi məktəbinin
VII sinif şagirdi, Prezident təqaüdçüsü Nəriman
Əmiraslanov və müəllimi Siala Sinamdzqvarişvili Mədəniyyət
və Turizm Nazirliyinin dəstəyi ilə 16-23 avqust tarixlərində
Avstriyanın paytaxtı Vyanada pianoçuların XII Beynəlxalq
müsabiqəsində iştirak ediblər.
Vyana şəhəri rəhbərliyinin
sponsorluğu və “Panmusica Austria” Assosiasiyasının təşkilatçılığı
ilə gerçəkləşən müsabiqə çərçivəsində
ustad dərsləri də keçirilib.
Üç yaş qrupu və iki mərhələdə
gerçəkləşən müsabiqədə Avstriya,
Rusiya, Yaponiya, Koreya, Çin, Monqolustan, Slovakiya, Sloveniya,
ABŞ, Ermənistan, Qazaxıstandan ifaçılar iştirak
ediblər. A qrupunda (12 yaşadək) ölkəmizi Nəriman
Əmiraslanov təmsil edib. Birinci mərhələdən
öncə professor Chung Leedən ustad dərsləri alan
yeniyetmə pianoçumuz V.A.Motsartın Do minor
Sonatasının birinci hissəsini və Lya major
Sonatasının üçüncü hissəsini - “Türk
marşi”nı ifa edib. Bu mərhələdə uğurla
çıxış edən Nəriman yeddi
iştirakçı ilə birlikdə ikinci mərhələyə
vəsiqə qazanıb. İkinci mərhələyədək
daha bir ustad dərsində Nəriman artıq ikinci mərhələnin
proqramını ( F.Şopen - Ekspromt lya bemol major, “Etud” lya
bemol major, K.Debüssi - “Ay işığı”) təqdim edib.
Müsabiqənin finalı avqustun 23-də
List zalında keçirilib. Kipr, Yaponiya, Argentina və Macarıstandan olan münsiflər heyətinin
qərarı ilə A
qrupunda ikinci mərhələdə çıxış
edən yeddi iştirakçıdan - birinci
yerə Çin, ikinci yerə Yaponiya nümayəndələri,
üçüncü yerə
isə Azərbaycanı
təmsil edən Nəriman Əmiraslanov layiq görülüb. Qaliblər diplomlar və xüsusi hədiyyələrlə
təltif olunublar.
Mədəniyyət.-
2012.- 29 avqust.- S. 3.