Xalq şairinin yubileyi qeyd olunub

Xalq şairi Mirvarid Dilbazinin anadan olmasının 100 illik yubileyinin qeyd olunması ilə bağlı Prezident İlham Əliyevin 2012-ci il 16 may tarixli sərəncamına uyğun olaraq bölgələrdə müxtəlif tədbirlər keçirilir.

Yevlax Şəhər Mərkəzi Kitabxanasında keçirilən tədbirdə həssas qəlbli şairin həyat və yaradıcılığından geniş bəhs edilib. Şairin yaradıcılığında Vətən sevgisi, uşaq aləmi, gəncliyin mənəvi dünyası, ana və övlad məhəbbəti ilə bağlı mövzuların geniş yer aldığı vurğulanıb. Bildirilib ki, M.Dilbazinin yaradıcılığı XX əsr Azərbaycan poeziyasının ən parlaq səhifələrindən birini təşkil edir. Onun ədəbiyyatımıza bəxş etdiyi poeziya nümunələri heç zaman öz təravətini itirməyəcək. Sonda məktəblilər şairin şeirlərini səsləndiriblər.

* * *

Bərdə Rayon Mərkəzləşdirilmiş Kitabxana Sistemində “Vətənpərvər şair” adlı kitab sərgisi keçirilib, “Mirvarid Dilbazi-100” kartotekası, “Vətənpərvər və mübariz ruhlu şair” adlı biblioqrafik icmal tərtib edilib.

Uşaq kitabxanasında M.Dilbazinin əsərlərindən ibarət sərgi və şeirlərinin qiraəti, filial kitabxanalarda kitab sərgiləri, “Məhsəti ruhlu şair”, “Xalq məhəbbəti qazanmış şair”, “Mirvarid Dilbazi-100” və sair ədəbi-bədii gecələr təşkil olunub.

Mədəniyyət.- 2012.- 29 avqust.- S. 6.