“Bizim Məmməd”
Moskva Satira Teatrına rəhbərlik edən həmyerlimiz
yubileyini qeyd edir
Həmvətənimiz, Rusiyanın Əməkdar mədəniyyət
işçisi, professor
Məmməd Ağayev 22 ildir
ki, Moskva Akademik Satira
Teatrının direktorudur. 1924-cü ildə
yaradılan teatrın indiyədək 4 direktoru
olub.
Mədəniyyət ocağına rəhbərlik
edən həmyerlimiz bu günlər 60 illik yubileyi münasibətilə
təkcə dostlarından, həmkarlarından, Azərbaycan diasporunun nümayəndələrindən deyil, ona böyük
hörmət və ehtiramla yanaşan məşhur rusiyalı aktyorlardan da təbriklər
qəbul edir.
Rusiyanın tanınmış aktyoru,
Satira Teatrının bədii rəhbəri
Aleksandr Şirvindt yubilyar haqqında deyir: “Məmməd
Hüseyn oğlu bənzərsiz,
parlaq şəxsiyyətdir. Əvvəla,
o, ömrünü
tamamilə teatra həsr etmişdir.
Hamıya yaxşı məlumdur ki,
teatrın direktoru həm artist,
həm də inzibatçıdır. O, teatra
sadiq adamdır, onunla
mübahisə etmək mənasızdır, aldatmaq
mümkün deyildir,
ağılsız xərclərə sövq
etmək çətindir. Ancaq əgər
primadonnadan tutmuş adi rekvizitçiyədək kiminsə yubileyi yaxınlaşırsa, sonsuz
fantaziya, geniş
ürək, əliaçıqlıq nümayiş
etdirir. Məmməd Ağayev
həm də yaxşı dostdur. Hamı bilir ki, ona
həmişə müraciət etmək olar
və o, köməyini əsirgəməyəcəkdir.
Bu, onun
amalıdır”.
Naxçıvanın Qaraxanbəyli kəndində doğulmuş M.Ağayev
uşaqlıqdan aktyorluq peşəsinə
həvəs göstərmiş, yeniyetmə
çağlarından Naxçıvan teatrında
quraşdırıcı, rekvizitçi
köməkçisi işləyib. Ali məktəbə
sənədlərini hazırlayanda hiss edir ki, ondan
böyük aktyor olmayacaq. Ancaq arzusundan belə asanlıqla əl çəkmək
də istəmirdi. Odur ki,
sənədlərini M.Əliyev adına Azərbaycan İncəsənət
İnstitutunun mədəni-maarif işi və rejissorluq
fakültəsinə təqdim edir və institutu bitirəndən sonra
təyinatla Naxçıvana yollanır. Sonra
SSRİ Mədəniyyət Nazirliyi yanında
ixtisasartırma kurslarını bitirən M.Ağayev
Moskva Satira
Teatrında staj keçir.
Məhz o zaman
teatrın kollektivi onun
təşkilatçılıq qabiliyyətini qiymətləndirir
və teatrda qalıb işləməsini
təklif edir. O vaxtdan
keçən 33 ilin 22 ilini
Məmməd Ağayev teatra
uğurla rəhbərlik edir.
Uğurunun sirri
barədə suala cavab
verən yubilyar deyir:
“Artistləri ürəkdən sevmək və anlamaq
lazımdır. Əks halda, teatrda işləmək mümkün
deyildir. Aktyorlar çox incə qəlbə malikdirlər.
Onların hər biri xüsusi
yanaşma tələb edir.
Yaradıcı insanlar üçün
səmimilik başlıca keyfiyyətdir”.
M.Ağayev Satira
Teatrının 2004-cü ildə Amerikada
keçirilən illik teatr
müsabiqəsində qalib gəlməsini
ömrünün ən yaddaqalan
məqamlarından biri kimi
xatırlayır. Teatr “İlin
ən yaxşı teatrı” nominasiyasında qalib
gəlmişdi: “Mükafatın təqdim olunduğu məqamda çox
böyük iftixar hissi keçirirdim. Əlbəttə,
o anda mən təkcə
doğma teatrıma verilən yüksək
qiymətə görə deyil, Vətənim
Azərbaycana və mənə özümü
şəxsiyyət kimi tapmaq
və uğur qazanmaq
imkanı verən Rusiyaya görə
qürur hissi duyurdum. Azərbaycan zəngin mədəniyyətə
və ənənələrə malik
ölkədir. Sevindirici haldır ki, Rusiyanın aparıcı teatrlarının
səhnələrində milliyyətcə azərbaycanlı olan istedadlı artistlər çoxdur.
Mən də fəxr edirəm ki, müəyyən
mənada unikal olan bu teatrın və bütövlükdə Rusiya teatr sənətinin ənənələrini
qoruyub saxlaya və inkişaf etdirə bilmişik”.
Həmvətənimizin yubileyi
münasibətilə “Bizim Məmməd”
hədiyyə bukleti hazırlanıb
Mədəniyyət.-
2012.- 31 avqust.- S. 5.