Xocalıya ədalət - Qarabağa azadlıq

 

Qazax Rayon Mərkəzi Kitabxanası anım tədbiri keçirib

Fevralın 22-də Qazax Rayon Mərkəzi Kitabxanası Xocalı şəhidlərinin anım günü ilə əlaqədar Xocalıya ədalət - Qarabağa azadlıq adlı dəyirmi masa keçirib.

Mədəniyyət evinin akt zalında keçirilən tədbiri Qazax rayon MKS-nin direktoru Solmaz Babanlı açaraq XX əsrin ən dəhşətli faciəsi kimi tarixə düşən Xocalı faciəsinin xalqımızın yaddaşından heç vaxt silinməyəcəyini bildirib. Natiq erməni silahlı dəstələrinin 1992-ci il fevralın 26-da Xocalıda həyata keçirdiyi soyqırımının dünyada tanıdılması üçün görülən işlərdən söz açıb.

Qazax Rayon Mədəniyyət və Turizm Şöbəsinin müdiri Valeh Vəliyev Xocalı soyqırımının 20-ci ildönümü haqqında ölkə Prezidentinin sərəncamının icrası ilə bağlı rayonun mədəniyyət müəssisələrində anım mərasimləri təşkil edildiyini nəzərə çatdırıb.

Mədəniyyət və turizm şöbəsinin məsləhətçisi Pəri Məmmədova, 3 saylı filial kitabxananın müdiri Sevda Hüseynova, metodika və biblioqrafiya şöbəsinin müdiri Fatma Hüseynova, informasiya-resurs mərkəzinin operatoru Könül Əsgərova Azərbaycan xalqının başına gətirilən tarixi müsibətlərin dünyaya yayılmasının hər birimizin vətəndaşlıq borcu olduğunu vurğulayıblar.

Tədbirin sonunda Xocalı faciəsi XX əsrin genosidi fotostendinə, Xocalı soyqırımı - unudulmayan faciə adlı kitab və dövri nəşr sərgisinə baxış keçirilib.

 

 

Mədəniyyət.- 2012.- 24 fevral.- S. 11.