“Azərbaycan
hər zaman bizə canımız qədər
əziz olub”
Sərvət
Kabaklı: “Biz böyük bir millətik. Şeirləri,
mahnıları, elmi əsərləri ilə bu millətə
ruh verənlər də onun qəhrəmanlarıdır”
İyulun 5-də AMEA-nın Məhəmməd Füzuli
adına Əlyazmalar İnstitutunda Azərbaycan-Türkiyə ədəbi-mədəni
əlaqələrinin inkişafında xidmətlərinə
görə Süleyman Sərvət Hacı Ömər
oğlu Kabaklıya “Fəxri doktor” adının verilməsi və
türk dünyasında tanınmış fikir adamı, ədəbiyyat
tarixçisi Əhməd Kabaklının “Harput əfsanələri”
kitabının təqdimat mərasimi oldu.
Əlyazmalar İnstitutunun direktoru
Paşa Əlioğlu iştirakçıları salamlayaraq
qardaş Türkiyədən ölkəmizə gələn
qonaqların iştirakı ilə belə bir mərasimin
keçirilməsindən şərəf duyduğunu bildirdi.
Direktor Əlyazmalar İnstitutunun tarixində ilk dəfə
olaraq “Fəxri doktor” adına Sərvət Kabaklının
layiq görüldüyünü nəzərə
çatdırdı və “Fəxri doktor” diplomunu qonağa təqdim
etdi.
«Can Azərbaycanın candan əziz
alimlərini salamlayıram» sözləri ilə
çıxışına başlayan Türk Ədəbiyyatı
Vəqfinin rəhbəri S.Kabaklı Azərbaycanın mötəbər
bir institutunun “Fəxri doktor”u adına layiq görülməsindən
böyük xoşbəxtlik hissi keçirdiyini dedi: “Burada əmim,
böyük ziyalı Əhməd Kabaklının xatirəsinin
belə əziz tutulduğu üçün də
özümü çox xoşbəxt hiss edirəm.
Bütün bunları böyük bir vəfa örnəyi
sayıram. Azərbaycan hər zaman bizim üçün
canımız qədər əziz olub”.
S.Kabaklı keçən əsrin əvvəllərindən
başlayaraq Azərbaycan xalqının dəfələrlə
erməni terroruna məruz qalmasını, Qarabağ müharibəsində
və ondan əvvəl saysız-hesabsız şəhid
verdiyini xatırladaraq onların xatirəsinin hər zaman
xalqlarımızın qəlbində yaşayacağına
inamını ifadə etdi. S.Kabaklı şəhidlərlə
yanaşı, öz ölkəsinin inkişafına xidmət
göstərən elm, sənət və ədəbiyyat
adamlarını da qəhrəman adlandırdı: “Biz
böyük bir millətik. Şeirləri, mahnıları,
elmi əsərləri ilə bu millətə ruh verənlər
də onun qəhrəmanlarıdır».
«Bizlər - elazığlılar azərbaycanlı
qardaşlarımızı çox sevirik”
Təqdim olunan «Harput əfsanələri»nin
ədəbi-bədii dəyərindən söz açan
S.Kabaklı bu kitabın Azərbaycan türkcəsində nəşr
edilməsində dəstəyini əsirgəməyən
xeyriyyəçi, dünyanın zəngin əntiq əşyalar
kolleksiyaçısı, Qarabağ qazisi Şahid Həbibullaya
minnətdarlığını bildirdi. Bakıya sonuncu dəfə
1996-cı ildə gəldiyini deyən S.Kabaklı aradan
keçən illər ərzində Azərbaycanın,
Bakının böyük bir iqtisadi inkişaf yolu
keçdiyini və bundan qürur duyduğunu bildirdi. Mərasimdə
Elazığın bələdiyyə sədri Süleyman
Salmanoğlu çıxış edərək hər zaman Azərbaycan
xalqının sevincini sevincləri, kədərini kədərləri
bildiklərini söylədi: «Bizlər - elazığlılar
azərbaycanlı qardaşlarımızı çox sevirik.
Bilirik ki, acılar paylaşanda azalır. İstəyirəm,
biləsiniz ki, Qarabağ bizim də dərdimizdir. Onun
acısını ürəyimizdə hiss edirik, Xocalı qətliamı
içimizi göynədir. Bizlər gələcəyə,
ümidə azərbaycanlı qardaşlarımızla birlikdə
yelkən açmaq istəyirik. Əl-ələ,
çiyin-çiyinə böyük bir güc
olmalıyıq ki, çətinliklər önümüzdə
diz çöksün».
Elazığda Azərbaycanla
bağlı görülən işlərdən, Azərbaycanın
görkəmli ədəbiyyat adamlarının xatirəsinə
keçirilən mərasimlərdən söz açan bələdiyyə
sədri həmyerlisi Sərvət Kabaklıya Əlyazmalar
İnstitutunun “Fəxri doktor”u adının verilməsindən
məmnunluğunu bildirdi, bu adın ümumən Elazığ
şəhərinə verilən yüksək qiymət olduğunu
dedi. S.Kabaklının 41 illik məslək həyatı boyunca
hər zaman Türkiyənin və Azərbaycanın milli-mədəni
inkişafına xidmət göstərdiyini vurğuladı.
Tədbirdə filologiya elmləri
doktoru Asif Rüstəmli çıxış edərək
Türkiyədə Azərbaycanın təbliğində
xüsusi xidmətləri olan Sərvət Kabaklının əməyini
yüksək dəyərləndirdi. A.Rüstəmli
çıxışında həmçinin
Elazığın bələdiyyə sədri
S.Salmanoğlunun da Azərbaycan naminə gördüyü
işlərdən söz açdı. Bildirdi ki,
Elazığın ən gözəl guşəsində Azərbaycan
parkının açılışı və orada şəhidlərimizə
abidənin ucaldılmasında bələdiyyə sədrinin
müstəsna xidmətləri var.
Alim çevirəni və “ön
söz”ünün müəllifi olduğu «Harput əfsanələri»
haqqında, kitabın müəllifi Əhməd Kabaklı barəsində
fikirlərini də bölüşdü: «XX əsr Türkiyəsinin
elmi-ədəbi, ictimai-fəlsəfi fikir gündəmində
Şeyxül-mühərrir Əhməd Kabaklı fədakar
araşdırıcılıq səriştəsinə,
analitik təfəkkürə, yenilikçi düşüncəyə,
milli ruha malik ədəbiyyat tarixçisi, ədəbiyyatşünas
alim, yazar, pedaqoq və jurnalist kimi tanınır və təbliğ
olunur. Onun son 45 ildə 14 dəfə nəşr edilən,
ümumi həcmi 4330 səhifədən çox olan
beşcildlik «Türk ədəbiyyatı tarixi” bu sahəyə
həsr edilən ilk və ən mükəmməl ensiklopediya
və türk ədəbi-mədəni mühitinin dolğun və
sanballı atlasıdır».
Millət vəkili, professor Musa
Qasımlı, «525-ci qəzet»in baş redaktoru,
Yazıçılar Birliyinin katibi Rəşad Məcid,
«Manas» nəşriyyatının rəhbəri Şener Bulud,
Türk Ədəbiyyatı Vəqfinin üzvü, şair
İsa Kocakaplan, filologiya elmləri doktoru, professor Qəzənfər
Paşayev belə tədbirlərin qardaş xalqları
bir-birinə daha da yaxınlaşdırdığını
vurğuladılar.
Mərasimdə Süleyman
Salmanoğluna, Şener Buluda və Şahid Həbibullaya
AMEA-nın Nizami adına Ədəbiyyat İnstitutunun «Azərbaycan
ədəbiyyatının dostları» diplomları təqdim
olundu.
Təranə Vahid
Mədəniyyət.-
2012.- 6 iyul.- S. 5.