Tatarlar Sabantuy bayramını qeyd etdilər

 

İyulun 15-də Azərbaycanda yaşayan tatarlar ən böyük milli bayramlarını - UNESCO tərəfindən bəşəriyyətin qeyri-maddi mədəni irs siyahısına daxil edilən Sabantuy bayramını qeyd etdilər.

Yaşlek Tatar Gəncləri Birliyi tərəfindən təşkil edilən tədbir Bakının Suraxanı rayonundakı Heydər Əliyev Parkında gerçəkləşdi. İştirakçılar əvvəlcə ümummilli liderin abidəsini ziyarət edərək önünə gül-çiçək dəstələri qoydular.

Atlı paradla müşayiət olunan mərasimdə Azərbaycan, Rusiya və Tatarıstanın bayraqları qaldırıldı. Musiqili hissədə Rufinia Feyzulinanın fleytada ifa etdiyi tatar milli musiqiləri maraqla qarşılandı. Sonra məktəblilərin paradı keçirildi. Bunun ardınca Yaşlek ansamblının ifasında rəqs və solo musiqi nömrələri təqdim olundu. Tatarıstanın və Rusiyanın Əməkdar artisti Zulfat Zinnurov, Məleykə Razanova, Diana Arifatovun ifaları dinlənildi. Suraxanı Rayon Mədəniyyət Evinin Cigitlər ansamblının çıxışı tədbirə xüsusi rəng qatdı.

Sonra Tatarıstan Prezidenti Rustam Minixanovun təbrik məktubu oxundu. Rusiyanın Azərbaycandakı səfirliyinin konsulu tatarları Sabantuy bayramı münasibətilə təbrik etdi. Tatarıstanın Azərbaycandakı daimi nümayəndəliyinin rəhbəri Aydın Əliyev bayram iştirakçılarını təbrik etdi. Yaşlek Tatar Gənclər Birliyinin rəhbəri Diaz Əhmədcanov da çıxış edərək tədbirə gələnlərə təşəkkürünü bildirdi.

Mərasimin təşkilində Tacibə Babayeva, Firdaniyyə Xozina, Yaşlek ansamblının bədii rəhbəri Alfiyya Axmedcanova digərləri aktiv iştirak etdilər. Tatarlar Sabantuy bayramının təşkilinə verilən dəstəyə görə, Mədəniyyət Turizm Nazirliyinə Suraxanı Rayon İcra Hakimiyyətinə minnətdarlıqlarını bildirdilər.

 

Mehparə

 

Mədəniyyət.- 2012.- 18 iyul.- S. 6.