Əhməd Cavadın 120 illik yubileyi qeyd edildi

İyunun 5-də Müslüm Maqomayev adına Azərbaycan Dövlət Filarmoniyasında istiqlal şairi, tərcüməçi, tanınmış ictimai xadim, Azərbaycanın dövlət himninin sözlərinin müəllifi Əhməd Cavadın 120 illik yubileyinə həsr olunmuş tədbir keçirildi.

Prezident İlham Əliyevin “Əhməd Cavadın 120 illik yubileyinin keçirilməsi haqqında” 2012-ci il 9 fevral tarixli sərəncamına uyğun olaraq keçirilən tədbirdə tanınmış mədəniyyət, ədəbiyyat və elm xadimləri, ictimaiyyət nümayəndələri iştirak edirdilər.

Tədbirin aparıcısı Milli Məclisin Mədəniyyət komitəsinin sədri, AMEA-nın müxbir üzvü, professor Nizami Cəfərov Əhməd Cavadı turançılıq düşüncəsi ilə şeir yazan müəllim və alim adlandırdı: “Əhməd Cavad əyilməz, mərd və hər işində millətini düşünən insan idi. O susanda belə onun şeirləri danışırdı”.

Tədbirdə çıxış edən mədəniyyət və turizm nazirinin birinci müavini Vaqif Əliyev şairin həyat yolundan danışdı. Qeyd etdi ki, bu gün Azərbaycan Xalq Cümhuriyyəti deyəndə ilk yada düşənlərdən biri də Əhməd Cavaddır. O, elə bir tarixi şəxsiyyət, elə sənətkardır ki, Azərbaycan tarixi üçün unudulmaz olaraq qalacaqdır”.

Azərbaycan Yazıçılar Birliyinin sədri, Xalq yazıçısı Anar ədibin kəşməkəşli həyatından, sağlam millətçi ideyalarından söz açdı, yaradıcılığı haqqında məlumat verdi.

Tədbirdə Xalq şairi Nəriman Həsənzadə, Əhməd Cavadın nəvəsi Anar Axundzadə, Türkiyədə mühacir həyatı yaşamış böyük şair Almas İldırımın oğlu Azər Almas çıxış etdilər. Əhməd Cavadın şeirlərindən parçalar oxundu, onun şeirlərinə bəstələnmiş “Can Azərbaycan”, “Çırpınırdın, Qara dəniz” və s. mahnılar səsləndirildi.

Tədbir Dövlət Xor Kapellasının ifasında Azərbaycanın dövlət himni ilə yekunlaşdı.

Reyhan

Mədəniyyət.- 2012.- 6 iyun.- S. 3.