Azərbaycan
Dünya Turizm Təşkilatının
toplantısında təmsil olunub
İyunun 11-13-də İspaniyanın paytaxtı Madriddə
Dünya Turizm Təşkilatının İcraiyyə
Şurasının 93-cü sessiyası keçirilib. Azərbaycanı
bu tədbirdə Mədəniyyət və Turizm Nazirliyinin
Turizm şöbəsinin müdir müavini Rauf Paşayev təmsil
edib.
Rauf Paşayevin qəzetimizə
verdiyi məlumata görə, qurumun iclasında DTT-yə
üzv ölkələrin turizm nazirləri və digər
yüksək vəzifəli məmurlar iştirak ediblər.
Açılış sessiyasında DTT-nin Baş katibi Taleb Rifai,
İspaniyanın sənaye, energetika və turizm naziri Xose Manuel
Soria çıxış edərək iqtisadi böhran
zamanı dünya iqtisadiyyatında turizmin vacib rol
oynadığını vurğulayıblar. Toplantıdakı
çıxışlarda qeyd olunub ki, 2011-ci ildə dünya
turizminin artımı 4,6% təşkil edib. Şimali və Cənubi
Amerika, Avropa, Cənub-Şərqi Asiya, Mərkəzi və Cənubi
Afrika kimi regionlarda turizmin inkişafı müşahidə
edilib. Yaxın Şərq və Şimali Afrika regionlarında
turistlərin sayı azalıb.
Bundan əlavə, tədbir
iştirakçıları turizmin inkişaf tendensiyaları,
DTT-nin prioritetləri, 2010-2011-ci illər üzrə iş
proqramının yerinə yetirilməsi, 2012-2013-cü illər
üzrə proqramın reallaşdırılması, təşkilatın
2012-ci il maliyyə vəziyyəti barədə müzakirələr
aparıblar. Tədbirin gedişində DTT-nin İcraiyyə
Şurasının növbəti sessiyasının 2012-ci ilin
oktyabrında Meksika, DTT-nin Baş Assambleyasının 20-ci
sessiyasının isə 2012-ci ilin 24-29 avqust tarixlərində
Zambiya, Keniya və Zimbabvedə keçirilməsi qərara
alınıb.
Fəxriyyə
Abdullayeva
Mədəniyyət.-
2012.- 22 iyun.- S. 9.