Azərbaycanda çay mədəniyyəti

 

Azərbaycan Dillər Universitetinin İnformasiya Resurs Kompleksinin nəzdində fəaliyyət göstərən Türk Dünyası Folklor Mərkəzi martın 2-də Azərbaycanda çay mədəniyyəti adlı tədbir və ənənəvi əl işləri sərgisi keçirdi.

Mərkəzin direktoru Rəna Salehova tədbirin Azərbaycanda çay mədəniyyətinin təbliğinə həsr olunduğunu nəzərə çatdırdı. Azərbaycan və Qafqaz Çay Federasiyasının rəhbəri Fərman Quliyev isə ölkəmizdə çay mədəniyyətinin tarixindən söz açdı: Çay dünyada geniş yayılıb və ona tələbat ildən-ilə artır. Ən çox çay içən xalq ingilislərdir. Hamıya bəllidir ki, çay insanda məhəbbəti artırır, onları bir-birinə daha da yaxın edir. İnsanlar çayı içərkən müsbət əhvalda olurlar. Azərbaycanda zəngin çay ənənələri var. Bütün mərasimlərimiz çayla keçirilir.

Tədbirdə universitetin regionşünaslıq kafedrasının əməkdaşları tərəfindən hazırlanmış Elçilik, Yas mərasimi, Çayxana və s. səhnəciklər təqdim olundu. Çayın dünyada yaranması, becərilməsi, tipləri, Azərbaycana bu bitkinin tarixi İpək Yolu vasitəsilə gətirilməsi, çayın süfrəyə verilməsi haqqında ətraflı məlumatlar verildi.

Sonda çay mədəniyyəti çalarlarını əks etdirən maraqlı və orijinal əl işlərinə baxış keçirildi.

 

Gülər

 

Mədəniyyət.- 2012.- 7 mart.- S. 13.