Xalq artisti Eldəniz Zeynalovun 75 illik yubileyi qeyd edildi

Martın 1-də Dövlət Film Fondunda Xalq artisti Eldəniz Zeynalovun 75 illiyinə həsr olunmuş xatirə gecəsi keçirildi. Mədəniyyət və Turizm Nazirliyi ilə Film Fondunun birgə təşkil etdiyi tədbirdə mərhum aktyorun həyat və yaradıcılığından söz açıldı.

Film Fondunun direktoru, Əməkdar incəsənət xadimi Cəmil Quliyev Eldəniz Zeynalovun yaradıcılıq yolundan danışaraq sənətkarın foto sənədlərinin fondda saxlanıldığını nəzərə çatdırdı. Bildirdi ki, istər adi insan, istərsə də sənətkarların xatırlanmasında fotoqrafiya böyük təsiredici qüvvəyə malikdir. Fotolar keçmişə bir səyahətdir və bu gün biz Eldəniz Zeynalovun yaşadığı ömür yoluna bu fotolar vasitəsilə səyahət edirik. Çıxışdan sonra fondda qorunan fotolardan ibarət videoçarx nümayiş olundu.

Kinoşünas Aydın Kazımzadə çıxış edərək aktyorun yaradıcılığı, keçdiyi sənət yolundan danışdı. Qeyd etdi ki, görkəmli sənətkar Xalq artisti olmaqla yanaşı, həm də bacarıqlı gülüş ustası idi. Onun yaratdığı obrazlar öz orijinallığı ilə seçilir və çoxşaxəli idi. O, teatr, kino və yaratdığı estrada studiyasında tamaşaçıya öz sözünü çatdıra bilmişdi. Həyatda yaxşı ad qoymaq özü də bir izdir. Eldəniz Zeynalov hər zaman yaxşılıqlarla xatırlanan insanlar cərgəsindədir.

Xatirə gecəsində rejissor Ələkbər Muradovun Eldəniz Zeynalova həsr etdiyi film nümayiş olundu. Filmdə sənət dostları aktyorla bağlı öz xatirələrini bölüşürlər. Gecədə aktyorun ailə üzvləri, tanınmış səhnə ustalarımız, kino xadimləri Əbdül Mahmudbəyov, Xalq artistləri Amaliya Pənahova, Tariyel Qasımov, Ramiz Məlikov, Əməkdar incəsənət xadimi Baba Bəziroğlu, Özbəkistan kinostudiyasında çalışan azərbaycanlı rejissor Eldar Məmmədov və başqaları iştirak edirdilər. Onlar Eldəniz Zeynalovun çox sadə və ünsiyyətcil insan olduğunu bildirdilər. Sonda ailə üzvləri adından aktyorun oğlu xatirə gecəsinə qatılanlara öz təşəkkürünü bildirdi.

Qeyd olundu ki, görkəmli aktyor 30-dan artıq filmdə irili-xırdalı obrazlar yaradıb. Aktyorun teatr səhnəsində yaratdığı rollar hər zaman tamaşaçı sevgisi qazanıb.

Lalə Azəri

Mədəniyyət.- 2012.- 2 mart.- S. 3.