Veterana ehtiram

9 May - Qələbə Günü ərəfəsində Respublika Veteranlar Şurasının Mədəniyyət və İncəsənət Universitetinin tələbə və müəllimləri ilə keçirdiyi görüşü, sözün əsl mənasında, bayram mərasimi adlandırmaq olardı. Faşizm üzərində qələbənin 67-ci ildönümünə həsr olunmuş tədbiri həm də bu qələbənin əldə olunmasında danılmaz xidmətləri olan veteranlarımıza tükənməz sayğı, ehtiram nümunəsi də adlandırmaq olardı. Tədbiri giriş sözü ilə açan tədris və tərbiyə işləri üzrə prorektor Rafiq Sadıxov görüşdə iştirak edən veteranları - general-mayor Bahadur Hüseynovu, polkovnik Rasim Muxtarovu, Surxay Tağızadəni, Əlövsət Baxışovu, kapitan Aleksandr Qritçenkonu ürəkdən salamladı.

Sonra söz veteranlar adından general B.Hüseynova verildi. Veteran hərbçi II Dünya müharibəsi illərində həmyerlilərimizin qəhrəmanlıq səhnələrindən, Bakı neftinin bu Qələbənin əldə edilməsində rolundan, gənclərə vətənpərvərlik ruhunun aşılamasının vacibliyindən söz açdı. A.Qrtiçenko universitetin tələbə və müəllimlərinə yenicə çapdan çıxmış kitabını bağışladı.

Universitetin səhnə danışığı kafedrasının dosenti, fəlsəfə doktoru Zülfiyyə Eldarqızının söylədiyi poeziya nümunələri, onun müəllim həmkarı Ağalar Bayramovun, musiqi sənəti fakültəsinin müəllimlərindən xalq artistləri Yalçın Rzazadə, Naspəri Dostəliyeva, Əməkdar artist İlqar Muradov, aşıq Əhliman Axundov və Fəzayıl Miskinlinin çıxışları tədbirə rəng qatdı.

Mərasim təltifsiz də ötüşmədi. Respublika KHVTİ-nin sədri, general Novruzəli Orucov gətirdiyi xatirə medallarını veteran cəbhəçilərə təqdim etdi.

Mədəniyyət.- 2012.- 9 may.- S. 15.

İ.Mehdizadə