“20 il Şuşasız”

Kitab sərgisi və kataloq təqdim olundu

Mayın 8-də M.F.Axundzadə adına Milli Kitabxanada «20 il Şuşasız» adlı kitab sərgisinin açılışı və «Şuşa Azərbaycanın tarix və mədəniyyət incisidir» kitab kataloqunun təqdimat mərasimi keçirildi.

Tədbiri kitabxananın direktoru Kərim Tahirov açaraq, Şuşa şəhərinin Azərbaycanın tarixində, mədəni irsində, incəsənətində rolundan danışdı: “İşğal olunmuş torpaqlarımızı mütləq qaytaracağıq. Azərbaycan dövlətinin həyata keçirdiyi siyasət göstərir ki, Şuşa nə yolla olur-olsun yenə bizim olacaq. Bizlərin üzərinə düşən odur ki, Şuşanın tarixi, mədəni irsi ilə bağlı materialları yığaq, təbliğ edək. Mədəniyyət və Turizm Nazirliyi tərəfindən nəşr olunan «Şuşa Azərbaycanın tarix və mədəniyyət incisidir» kataloqu da məhz bu məqsədlə tərtib olunub”.

Mədəniyyət və Turizm Nazirliyinin Nəşriyyat sektorunun müdiri Çingiz Əlioğlu Şuşanın işğalının hər bir azərbaycanlı üçün ağır dərd olduğunu dedi: “İnsanı başqa canlı varlıqlardan doğma torpağa bağlılıq fərqləndirir. Hər birimizin ayrılıqda problemimiz ola bilər. Lakin hər zaman bütün bu problemlərdən söz açmazdan öncə vətənimizin işğalda olan torpaqlarını düşünməliyik. Bu, böyük tarixi haqsızlıq, ədalətsizlikdir. Vaxt gələcək, bu ədalətsizliyə son qoyulacaq. Bu gün dünyanın bir çox yerlərində keçirilən kitab sərgilərində Şuşa barədə, Qarabağ barədə müxtəlif dillərdə kitablar, nəşrlər sərgilənir. Bu iş davam etdirilməli, tarixi həqiqətləri əks etdirən yeni nəşrlər çap olunmalı, dünyaya yayılmalıdır».

Azərbaycan Yazıçılar Birliyinin katibi, “525-ci qəzet”in baş redaktoru Rəşad Məcid də çıxış edərək, Şuşanın tarix və mədəniyyəti ilə bağlı kitab-kataloqun nəşr olunmasını yüksək qiymətləndirdi: “Şuşanın hər məkanı bir tarixdir. Şuşa mədəniyyətimizin ruhudur. Biz ruhumuzu itirməsək, Şuşa yenə bizimlə olacaq».

Qeyd edək ki, «Şuşa Azərbaycanın tarix və mədəniyyət incisidir» kataloqunda şəhərin yaranması, tarixi, mədəniyyəti haqqında ətraflı məlumatlar yer alıb. Nəşrdə Şuşa qalası, tarixi-memarlıq abidələri, Şuşanın görkəmi şəxsiyyətlərinin fotoları, milli geyimlər, xalçalar, zinət əşyaları və s. yer alıb.

Gülər

Mədəniyyət.- 2012.- 9 may.- S. 4.