Şəkidə
atüstü turist yürüşü
Mədəniyyət
və Turizm Nazirliyinin təşkilatçılığı
ilə mayın 7-də Şəkidə atüstü turist
yürüşü keçirildi. Tədbir ümummilli
lider Heydər Əliyevin anadan olmasının 89-cu ildönümünə
həsr olunmuşdu. Yürüş iştirakçıları
mayın 6-da günorta saatlarında rayonun mərkəzində
yerləşən karvansaraya çatdılar. Nahardan
sonra, saat 15-də turizm şirkətləri və KİV
nümayəndələrindən ibarət 21 nəfərlik
heyət Respublika Atçılıq Turizm Mərkəzinin
Şəki filialına yollanmaq üçün karvansarayın
önünə toplaşmışdı.
Respublika
Atçılıq Turizm Mərkəzinin Şəki filialında
Mərkəzin Şəki filialı
rayon mərkəzindən 25 kilometr aralıda yerləşən
Daşüz kəndinin ərazisindədir. Kənd hər
tərəfdən dağlar və meşələrlə
əhatələnib. Azərbaycanda atçılıq
turizminin inkişaf etdirilməsi məqsədilə mərkəz
bir neçə turizm marşrutu müəyyənləşdirib.
Bu marşrutlardan biri Atçılıq Turizm Mərkəzinin
Şəki filialından başlayaraq Daşbulaq kəndi
ərazisində yerləşən Çorqat meşəsində
başa çatır. Bu məlumatı bizə Şəki
Turizm İnformasiya Mərkəzinin rəhbəri Nəsib
İmaməliyev deyir. Onun sözlərinə görə,
Şəkiyə təşrif buyuran turistlər rayonun
tarixi, qədim abidələri, təbiəti ilə bərabər,
ekstremal atüstü marşrutlarla da yaxından maraqlanırlar.
Atçılıq mərkəzində
bizi qurumun rəhbəri Elman Qədirov və digər əməkdaşlar
qarşıladılar. Qeyd edək ki, Respublika Atçılıq
Turizm Mərkəzinin balansında olan bütün atlar
Şəki filialında saxlanılır. Filialda təxminən 50 baş
at var, onların içərisində cins
atlar üstünlük
təşkil edir. E.Qədirovun dediyinə görə,
atların əksəriyyətini
Rusiyadan alıblar.
Mərkəzin balansına daxil
olan atlar təmizqanlı ingilis,
ərəb, alman cins atları, Axaltəkə cinsi, Mərəzə atları,
rus löhrəmi, həmçinin də yerli atlardır.
İnfoturun proqramına uyğun
olaraq, mərkəz əməkdaşları əvvəlcə
iştirakçılara atsürmə vərdişləri
ilə bağlı
2-3 saatlıq təlim
keçdilər. Qeyd edək
ki, bu posedur
atla gəzintiyə
çıxmaq istəyən
bütün turistlər
üçün nəzərdə
tutulub. Axşama doğru
atla qısa məsafəli gəzintimizi
başa vurub, karvansaraya qayıtdıq.
Şəkidə 16 turizm
obyekti fəaliyyət
göstərir
Böyük Qafqazın cənub
ətəklərində yerləşən Şəki
Azərbaycanın ən
qədim şəhərlərindən
biridir. Təxminən
3 min il yaşı
olan Şəki turistlər üçün
cəlbedici bir məkandır. Gözəl təbiəti, iqlimi,
memarlığı, tarixi-mədəni
abidələri, özünəməxsus
adət-ənənələri, nadir sənətkarlıq növləri,
təkrarsız Şəki
mətbəxinin ləziz
xörəkləri turizmin
sürətlə inkişaf
etdiyi hazırkı
dövrdə böyük
əhəmiyyət kəsb
edir.
Nəsib İmaməliyevin sözlərinə görə,
hazırda Şəkidə
16 iri turizm obyekti fəaliyyət göstərir. Bunlardan 14-ü Mədəniyyət və
Turizm Nazirliyi tərəfindən lisenziya
alıb.
İnfotur çərçivəsində
ilk baş çəkdiyimiz
turizm obyekti «Narın Qala» istirahət kompleksi (Narin Qala Cottage Complex) oldu. Kompleks şəhərin mərkəzinə yaxın
yerləşir. Kiş çayı
istirahət mərkəzinin
cəmi bir neçə metrliyindən
axır. «Narın
Qala»nın bir özəlliyi də onun yaxınlığında
Alban qəsrinin yerləşməsidir.
Hər tərəfdən meşə
ilə əhatə olunan turizm obyekti 2005-ci ildən fəaliyyət göstərir.
İstirahət mərkəzinin direktoru Ramazan Həmidovun sözlərinə
görə, buraya yay fəslində daha çox turist gəlir. Bütövlükdə istirahət
zonasında vanna otağı, mətbəxi,
peyk televizoru olan 20 lüks kottec var. Mərkəzin
həyətində uşaq
oyun meydançası,
tennis zalı və restoran da fəaliyyət
göstərir. Bundan əlavə,
mərkəzdə dincələn
turistlərə avtobusla
Şəki şəhərində
yerləşən müxtəlif
tarixi məkanlara ekskursiya marşrutu da təklif olunur.
Şəkidə
tanış olduğumuz daha bir turizm obyekti
rayon mərkəzinin yaxınlığında
yerləşən Olimpiya
İdman və İstirahət Kompleksidir.
Burada eyni zamanda 200 nəfər qonaq qəbul etmək mümkündür. Kompleksdə
müxtəlif idman
oyunlarının təşkili
üçün zallarla
yanaşı, rəsmi
görüşlərin, tədbirlərin keçirilməsi
üçün konfrans
zalı da var. Qonaqların vaxtlarını
səmərəli keçirməsi
üçün burada
stolüstü tennis, bilyard,
qapalı hovuz, sauna,
böyük tennis kortu,
akvapark, uşaqlar üçün oyun zalı və s. fəaliyyət göstərir.
Daşüz-Daşbulaq-Çorqat marşrutunun uzunluğu
35 km-dir
İnfoturun ikinci günü
(7 may) səhər saat
8.30-da yenidən Şəki
atçılıq bazasına
yollandıq. Burada yürüşün
başlanması üçün
hər şey hazır idi. 20-dən artıq at mərkəz əməkdaşları
tərəfindən yəhərlənmiş
halda bizi gözləyirdi.
Şəki Şəhər Mədəniyyət
və Turizm Şöbəsinin müdiri
Aydın İbrahimxəlilov
tədbir barədə
iştirakçılara qısa məlumat verərək bildirdi ki, bölgədə turizmin bütün növlərinin inkişafı
üçün potensial
var. Rayonun təbiəti
və relyefi burada xüsusilə dağ-meşə turizm növünün təşəkkül tapmasına
şərait yaradır:
«Ümummilli lider Heydər Əliyevin xatirəsinə həsr
edilmiş bu atüstü yürüşün
təşkil edilməsində
də əsas məqsəd Şəkinin
turizm potensialını
tanıtmaqdır. Tədbir həmçinin
“Eurovision-2012” mahnı müsabiqəsi
ilə əlaqədar
Azərbaycana gələcək
qonaqların atüstü
turizmə cəlb edilməsində və atüstü turizm marşrutlarının təbliğində
mühüm rol oynayacaq».
Saat 11:30-da Mədəniyyət və
Turizm Nazirliyinin Turizm şöbəsinin
Daxili turizmin inkişafı sektorunun
əməkdaşları Cəfər Qarayev və Anar Salmanovun
rəhbərliyi ilə
20 nəfərdən ibarət
qrup Atçılıq
Mərkəzindən Çorqat
meşəsi istiqamətində
yürüşə başladı.
Qeyd edək ki, Daşüz-Daşbulaq-Çorqat turizm marşrutunun uzunluğu 35 km, davam etmə müddəti 8 saatdır. Məsafəni atla qət
edənlər Daşüz
kəndinin yuxarı
hissəsindən cənub-qərb
istiqamətini tutub
Daşbulaq kəndinə
doğru hərəkət
edir. Yolumuz öncə dağ,
sonra isə düzənlik ərazidən
keçir. Marşrutumuzun üzərində yerləşən
Daşbulaq kəndi
ərazisindəki alban
məbədini ziyarət
etdikdən sonra üzü qərbə enişli-yoxuşlu yollarla
Çorqat meşəsinə
tərəf istiqamət
götürürük. Yolboyu qarşılaşdığımız mənzərələr insanı
valeh edirdi. Təbiət o qədər ecazkar
idi ki, yolların
narahatlığını belə hiss etmirdik.
Təxminən 10 km məsafə qət etdikdən sonra Çorqat meşəsində geniş
bir ərazidə yerləşən bulağın
başında düşərgə
qurduq.
Çorqat dərəsində
üç alban məbədinin qalıqları
var
Meşənin
içərisində qurulan
düşərgədə nahar etdikdən sonra isə Elman Qədirov yaxınlıqdakı
alban məbədləri
haqqında məlumat
verdi. Onun dediyinə
görə, sonuncu alban məskəni Çorqat meşəsində
olub. Ümumiyyətlə
isə, 1 kilometr məsafəni əhatə
edən Çorqat dərəsində 3 alban
məbədinin qalıqları
var ki, bu
da onların Şəki ərazisində
çox sıx yaşadığını sübut
edir. Yerli tarixçilərin fikrincə, onlar XIII əsrə qədər burada yaşayıblar.
Ərəb işğalı və İslam dininin yayılmasından
sonra isə bu ərazilərdən köçüblər. Bir maraqlı faktı da bildirək ki, ötən əsrin əvvəllərində
ərazidə məskunlaşmış
ermənilər burada
da iyrənc əməllərindən qalmayıblar.
Belə
ki, onlar alban kilsələrinin
daşları üzərində
erməni yazıları
yazıb, pəncərələri
söküb öz tərzlərinə uyğun
tikiblər, eyni zamanda albanlara məxsus xaçların
əlamətlərini dəyişdirib
erməni xaçına
bənzətməyə çalışıblar.
Lakin diqqətli tədqiqatçılar
bütün bunların
sonradan quraşdırma
olduğunu baxan kimi bilirlər.
Marşrut barədə məlumatların
yer aldığı
lövhəni bulağın
başında basdırıb
yenidən atlarla Daşüz istiqamətində
geriyə qayıtdıq.
Qayıdanda yolumuz Topxana
və Molladərə
adlanan ərazilərdən
keçdi. Təxminən 2 saatdan sonra artıq Atçılıq
Mərkəzində idik.
Sənət məbədi
- Şəki xanlarının
sarayı
İnfoturun 3-cü günü
(8 may) Şəki xanlarının
yay sarayı ilə tanış
olduq. Azərbaycan orta əsr
memarlığının ən görkəmli abidəsi olan bu saray şəhərin
yuxarı hissəsində,
yüksəklikdə yerləşir.
Şəkiyə ayaq basan istər yerli, istərsə də əcnəbi qonaqların
ziyarət etdikləri
ilk məkan da məhz buradır. Bu memarlıq incisi
Azərbaycanda ilk müstəqil
xanlığın əsasını
qoyan Hacı Çələbi xanın
nəvəsi Hüseyn
xanın dövründə
tikilib. Hüseyn xan
eyni zamanda «Müştaqi» təxəllüsü
ilə şeirlər
yazdığından bəzi
mənbələrdə bu
saray «Müştaqi
imarəti» kimi də qeyd olunur.
XVIII əsrin
yadigarı olan bu tarixi tikili
öz görünüşü,
tikilmə üslubu,
mürəkkəb ornamentləri,
xüsusilə də
şəbəkələri ilə diqqəti cəlb edir. İkimərtəbəli sarayın mərtəbələri
arasında əlaqəni
təmin edən pilləkənlərdən biri
qadınlar, digəri
kişilər üçün
nəzərdə tutulub.
Hasarla əhatəyə alınmış
sarayın həyətindəki
möhtəşəm çinarların
yaşı isə sarayın yaşından
çoxdur.
Yuxarıbaş
Dövlət Tarix Memarlıq Qoruğunun
direktoru Təranə
Abdullayeva bildirdi ki, ötən il Şəki
şəhərini 14 mindən
artıq turist ziyarət edib. Onun sözlərinə görə,
şəhərə gələn
turistlərin əksəriyyəti
Şəki xanlarının
sarayını mütləq
ziyarət edir.
Qeyd edək ki,
1999-cu ildə Azərbaycan
hökuməti ilə
Beynəlxalq İnkişaf
Assosiasiyası arasında
imzalanan müqaviləyə
əsasən, «Mədəni
irsin qorunması» layihəsi çərçivəsində
saray təmir və bərpa olunub. Sarayın özülü möhkəmləndirilib, taxta
döşəmə dəyişdirilib.
Şəki xanlarının sarayını
ziyarət etdikdən
sonra avtobusumuz Bakıya doğru istiqamət götürdü...
Fəxriyyə Abdullayeva
Mədəniyyət.-
2012.- 11 may.- S. 9.