“Üzeyir bəyin kitabxanasından boylanan sirlər”
Mayın 18-də
Üzeyir Hacıbəylinin
ev-muzeyində Beynəlxalq
Muzeylər Günü
münasibətilə “Açıq
qapı” günü keçirildi. Bu dəfə muzeydə “Üzeyir bəyin kitabxanasından boylanan sirlər” adı altında bəstəkarın
kitabxanasından nümunələr
nümayiş olundu.
Ev-muzeyinin direktoru, Əməkdar incəsənət xadimi, bəstəkar Sərdar Fərəcov Üzeyir bəyin zəngin kitabxanası barədə
məlumat verdi:
“Bu dəfə Beynəlxalq
Muzeylər Günü
ilə bağlı qərara gəldik ki, Üzeyir bəyin kitabxanasından bəzi kitabları nümayiş etdirək. Çünki kitab hər
bir şəxsiyyətin
daxili aləmini göstərən güzgüdür.
Bu kitablar da
Üzeyir bəyin zəngin mütaliəsindən,
geniş dünyagörüşündən
xəbər verir.
Onların bir qismi Üzeyir bəyin
1912-1914-cü illərdə Moskvada, Peterburqda təhsil alarkən oxuduğu, öyrəndiyi
kitablardır. Bəstəkar o dövrdə dünya musiqiçilərinin əsərlərini
mütaliə edib, öyrənib. Dünya musiqi
xəzinəsinin inciləri
ilə tanış olan Üzeyir bəy ölməz əsərlər yaradaraq milli musiqimizi ən yüksək zirvələrə ucaldıb”.
Nümayiş olunan kitablar arasında Üzeyir Hacıbəyli və Müslüm Maqomayevin
1927-ci ildə çap
olunan “Azərbaycan türk el nəğmələri”,
Seyid Əzim Şirvaninin “Divanilər”,
Zeynalabdin Marağayinin
“İbrahim bəyin səyahətnaməsi” əsəri
var. Üzeyir bəyin
tələbələrinin avtoqrafla
müəllimlərinə bağışladıqları
nəşrlər - Səid
Rüstəmovun “Tar məktəbi”,
Cəvahir Həsənovanın
“Kamança məktəbi”,
eləcə də dünya musiqi nəzəriyyəçilərinin kitabları da dahi bəstəkarın kitabxanasını bəzəyir.
“Üzeyir
bəyin kitabxanasından
boylanan sirlər” ayrılıqda bir dünyadır. Bu dünya öz tədqiqatçısını gözləyir.
Təranə Vahid
Mədəniyyət.-
2012.- 23 may.- S. 3.