Abidələrin bərpası, konservasiyası və istifadəsi layihəsi hazırlanıb

Son beş ildə ölkəmizdə 30-dan çox abidədə elmi-tədqiqat işləri aparılıb, onların bərpası, konservasiyası və istifadəsi layihəsi hazırlanıb. Bu barədə Mədəniyyət və Turizm Nazirliyinin Tikilən Obyektlərin Birləşmiş Müdiriyyətinin rəisi Zakir Sultanov məlumat verib.

Bu işlər Mədəniyyət və Turizm Nazirliyinin, Tikilən Obyektlərin Birləşmiş Müdiriyyətinin sifarişi əsasında “Azərbərpa” Elmi-Tədqiqat Layihə İnstitutu tərəfindən aparılır. Artıq Şəki şəhərindəki Aşağı Karvansarada, Nakam adına kitabxanada, Quba rayonunun Rustov kəndindəki məsciddə, Hacıqabul rayonunun Qubalı Baloğlan kəndindəki Pir Hüseyn xanəgahında, Balakən rayonundakı məsciddə, Salyan şəhərindəki məsciddə, Nardarandakı Xan bağında, Lənkərandakı Dairəvi Qalada bərpa işləri başa çatdırılıb. Gəncədə “Şah Abbas” və “Uğurlu xan” karvansaralarında, Füzuli rayonunun Babı kəndindəki Şeyx Babı türbəsində, Bakı şəhərinin Suraxanı qəsəbəsindəki “Atəşgah” məbədində, Bərdə rayonundakı “Allah-Allah” türbəsində bərpa işləri davam etdirilir.

Əvvəlki illərdən fərqli olaraq hazırda abidələrin bərpa-konservasiya layihələri ilə birlikdə onların istifadə layihələri də hazırlanır. Bu, həmin abidələrin uzun müddət qorunmasına zəmin yaradacaq. Hazırlanmış layihə-smeta sənədləri əsasında abidələrdə bərpa-konservasiya işlərinə nazirliyin, Tikilən Obyektlərin Birləşmiş Müdiriyyətinin və “Azərbərpa” Elmi-Tədqiqat Layihə İnstitutunun mütəxəssisləri nəzarət edirlər.

Azərbaycanın Gürcüstan ilə sərhədində yerləşən “Sınıq” körpünün də bərpası nəzərdə tutulur. Hər iki dövlət arasında razılaşma protokoluna əsasən, abidənin bərpa layihəsi hazırlanıb. Orada arxeoloji tədqiqat işlərinin aparılması da planlaşdırılır.

Eyni zamanda, Suraxanı qəsəbəsindəki “Atəşgah” məbədində və Füzuli rayonunun Babı kəndindəki Şeyx Babı türbəsində AMEA Arxeologiya və Etnoqrafiya İnstitutunun əməkdaşları ilə birlikdə arxeoloji tədqiqat işləri də aparılıb. “Atəşgah” məbədində aparılmış arxeoloji qazıntı işləri zamanı od quyuları, daşdan tikilmiş qaz xətləri, qaz anbarı, su quyusu və s. maraq kəsb edən mədəni təbəqələr aşkar olunub. Şeyx Babı kompleksində aparılan arxeoloji qazıntı işləri zamanı kaşılarla bəzədilmiş sərdabələr, karvansara qalıqları, kompleksin mühafizə divarlarının qalıqları aşkar olunub.

Mədəniyyət.- 2012.- 9 noyabr.- S. 8.