Əməkdar artist Məmmədağa Dadaşovun 100 illik yubileyi qeyd edildi

Noyabrın 20-də Mədəniyyət və Turizm Nazirliyinin təşkilatçılığı ilə Dövlət Gənc Tamaşaçılar Teatrında görkəmli sənətkar, Əməkdar artist Məmmədağa Dadaşovun 100 illik yubileyinə həsr edilmiş gecə keçirildi. Tədbirdə teatrın direktoru, Əməkdar artist Mübariz Həmidov çıxış edərək Məmmədağa Dadaşovun həyat və yaradıcılığı barədə danışdı. Aktyorun çəkildiyi filmlərdən və televiziya tamaşalarından kadrlar nümayiş olundu.

Mərasimdə qeyd edildi ki, Məmmədağa Ağakərim oğlu Dadaşov 1912-ci il aprelin 12-də Bakıda doğulmuşdur. Məktəb illərində 40 nömrəli pioner dəstəsinin dram dərnəyinin üzvü olmuş, səhnəyə isə ilk dəfə 14 yaşında çıxmışdır. Dövlət Gənc Tamaşaçılar Teatrı da həmin dərnəyin bazasında yaradılmış və truppanın ilk aktyorlarından biri də məhz M.Dadaşov olmuşdur. O, ömrünün sonunadək bu teatrdan ayrılmamış, komediya, faciə, nağıl-tamaşalarda bir-birindən fərqli amplualarda, müxtəlif xarakterli 200-dən artıq obraz yaratmışdır. 1957-ci ildə Əməkdar artist adına layiq görülmüşdür. Sənətkar 1996-cı ildə vəfat etmişdir.

Yubiley gecəsində Azərbaycan Teatr Xadimləri İttifaqının sədri, Xalq artisti Azərpaşa Nemətov, xalq artistləri Yasin Qarayev, Tariyel Qasımov, Əməkdar artist Cəfər Namiq Kamal və başqaları aktyorla bağlı xatirələrini bölüşdülər. Onun yüksək yumor hissinə sahib olmasından, bu yumorlarının indiyədək yaddaşlarda qalmasından söhbət açdılar. Yasin Qarayev görkəmli aktyorun illər əvvəl ona hədiyyə etdiyi şəxsi ordenini teatrın gənc rejissoru Nicat Kazımova bağışlayaraq dedi: “Məmmədağa müəllimin hələ gənc yaşlarımda mənə bağışladığı bu orden sənətimdə uğurlar gətirdi. İndi isə mən onu nəsildən-nəslə ötsün deyə sənə bağışlayıram və arzu edirəm ki, sən də onu özündən sonra gələn gənc nəslə təqdim edəsən. Çünki teatrımızın yaradıcılarından biri olan Məmmədağa müəllimin nəfəsi hər zaman bu binanın divarlarında hiss olunur”.

Tədbirdə o da bildirildi ki, M.Dadaşovun əski əlifba ilə yazılmış arxivi vardır və onu mədəni ictimaiyyətə təqdim etmək lazımdır. Çünki həmin arxiv Azərbaycan teatrının tarixidir. M.Dadaşov çox təvazökar insan olmuş, özü haqqında heç vaxt yazmamışdır. Onun bütün yazıları Azərbaycan teatrının tarixindən bəhs edir. Eyni zamanda, təəssüflə bildirildi ki, indiyədək sənətkarın əlyazmaları heç yerdə dərc olunmamışdır. Yubiley gecəsində həmçinin aktyorun indiyədək efirdə getməmiş müsahibəsinin lent yazısından fraqmentlər nümayiş etdirildi.

Tanınmış müğənni Təranə Mahmudova, Əməkdar artist Gülyaz Məmmədova, Gənc Tamaşaçılar Teatrının aktrisası Almaz Mustafayeva, xanəndə Firuz Səxavət, “Cəngi” rəqs ansamblı, “Təbəssüm” uşaq rəqs qrupu, Dadaşovlar nəslinin nümayəndələri Həcər Ağayeva və Tahir Eynullayevin ifaları tədbir iştirakçılarına xoş anlar bəxş etdi. Sonda aktyorun qızı, Əməkdar artist Kübra Dadaşova yubiley gecəsinin təşkilində əməyi olan hər kəsə minnətdarlığını bildirdi.

L.Azəri

Mədəniyyət.- 2012.- 23 noyabr.- S. 6.