Zərgərlik incə sənətdir

Sentyabrın 22-29-da Rusiyanın Sankt-Peterburq şəhərində gənc dizayner-zərgərlərin “Obraz və forma” adlı beynəlxalq müsabiqəsi keçirilib. Müsabiqəyə Rusiya, Azərbaycan, İtaliya, Litva, Yunanıstan və Almaniyadan 35 gənc qatılıb. Mədəniyyət və Turizm Nazirliyinin dəstəyi ilə müsabiqədə respublikamızı təmsil edən dizayner-zərgər Ramin Ağayev bu günlərdə redaksiyamızın qonağı oldu.

- Ramin, öncə özün barədə qısa məlumat verərdin...

- 1977-ci ildə Lənkəran şəhərində anadan olmuşam. Atam ticarətçi, anam isə müəllimdir. Erkən yaşlarımdan əl qabiliyyətim olsa da, əvvəl-əvvəl sənətə, rəssamlığa elə də həvəsim olmayıb. Orta məktəbin yuxarı siniflərində məndə sənətə maraq yarandı. 1994-cü ildə sənədlərimi Lənkəran Rəssamlıq Məktəbinə verdim, orta məktəblə bərabər orada da oxudum. Ancaq yenə də bu sənətin dalınca getmədim. 1996-2000-ci illərdə Təfəkkür Universitetində təhsil aldım.

- Necə oldu ki, bu sənətə gəldin?

- Hərbi xidmətdə olarkən rəssamlıq hislərim yenidən baş qaldırdı. Boş vaxtlarımda şəkil çəkər, bəzən ağac üzərində oyma naxışlar açardım. Anar Sadıqov adlı əsgər yoldaşım vardı. O da rəssam idi. Bir gün mənə dedi ki, görürəm, yaxşı əl qabiliyyətin var, səndən yaxşı dizayner-zərgər olar. Beləliklə, o, məndə bu sənətə hədsiz maraq yaratdı. Hərbi xidmət başa çatdı. Biz evə qayıtdıq. Sonra birlikdə Bakıdakı Mərkəzi Univermaqda Həsənağa Babazadənin zərgər sexinə getdik. İki il onun yanında işlədim. Bu sənətin sirlərini ondan öyrəndim. 2005-ci ildə sərbəst fəaliyyətə başladım. Sonra işimi daha yüksək səviyyədə qurmaq istədim. Elə oldu ki, internet vasitəsilə İtaliyanın “Roberto-Coin” zərgərlik şirkəti ilə əlaqə yaratdım. Şirkətin direktoru Antonio Bedoni ilə görüşdüm. O, mənim əl işlərimlə tanış oldu. Bəzi müzakirələr apardıq. Əl işlərimi bəyəndiyini bildirdi. Sonra məni şirkətlərində işə dəvət etdi. Orada bir müddət işlədim, amma sonra onlardan ayrıldım.

- Səbəb nə oldu?

- Orada işlədikcə beynəlxalq dizayn-zərgərlik əlaqələri, zərgərlik mədəniyyəti ilə yaxından maraqlanır, kataloqlara baxırdım. Orada çox ölkələrin adı, ünvanı vardı. Ancaq Azərbaycanın adı yox idi. Sonra fikirləşdim ki, bizdə də bu mədəniyyəti inkişaf etdirib dünyaya tanıtmaq olar. Müəyyən araşdırmalar aparmağa başladım. Qobustan Milli Tarix-Bədii Qoruğuna getdim. Orada qayaüstü şəkillərə baxdım, eskizlər götürdüm və layihə işlədim. Həmin layihə ilə Mədəniyyət və Turizm Nazirliyinə müraciət etdim. Layihəm bəyənildi. Nazirliyin xətti ilə bu il sentyabrın 22-29-da Sankt-Peterburq şəhərində keçirilən “Obraz və forma” adlı beynəlxalq dizayner-zərgərlər müsabiqəsinə qatıldım.

- Müsabiqədə hansı əsərlərinlə iştirak etdin?

- Sankt-Peterburqdakı Etnoqrafiya Muzeyində keçirilən müsabiqədə altı əsərlə iştirak etdim. “Şeyx Səfi”, “Qobustan”, “Bakı küləyi”, “Muğam” adlı əsərlərim maraqla qarşılandı. Birinci yeri rusiyalı dizayner qazandı. İkinci-üçüncü yerə isə mənim əl işlərim layiq görüldü. Diplom və müxtəlif hədiyyələrlə təltif olundum. Bu nailiyyət sənətə olan marağımı, yaradıcılıq həvəsimi daha da artırıb. Mədəniyyət və Turizm Nazirliyinin mənə göstərdiyi dəstəyə görə minnətdaram. Çalışacağam ki, gələcəkdə də müxtəlif müsabiqələrdə ölkəmizi layiqincə təmsil edim.

Savalan Fərəcov

Mədəniyyət.- 2012.- 10 oktyabr.- S. 11.