Kitabxanada Hüseyn Cavidin 130 illiyi qeyd edildi

Oktyabrın 5-də Səbail rayon MKS-nin Mərkəzi kitabxanasında Azərbaycan ədəbiyyatının görkəmli nümayəndəsi, şair, dramaturq Hüseyn Cavidin anadan olmasının 130 illiyinə həsr olunmuş tədbir keçirildi.

Tədbiri MKS-nin direktoru Nüşabə Ələkbərova açaraq Hüseyn Cavidin ədəbiyyatımızın ən parlaq simalarından biri olduğunu, onun sənətinin bütün zamanlar üçün əbədiyaşarlığını vurğuladı. AMEA-nın Milli Azərbaycan Ədəbiyyatı Muzeyinin şöbə müdiri Nuranə Əsədullayeva böyük ədibi filosof şair, tarixi dramların banisi kimi xarakterizə etdi.

Hüseyn Cavid ev-muzeyinin direktoru Gülbəniz Babaxanlı bu mədəniyyət ocağının yaranma tarixindən danışaraq, muzeydə saxlanılan eksponatlar haqqında məlumat verdi. “Cavid ömrü” filmində Hüseyn Cavid və Müşkinaz xanım obrazlarını yaratmış Xalq artisti Rasim Balayev və Əməkdar artist Dilarə Əliyeva ekran əsərinin çəkilişləri ilə bağlı xatirələrini bölüşdülər.

Tədbirdə söz alan digər ədəbiyyat və teatr xadimlərinin çıxışlarında Cavid yaradıcılığı bir daha yad edildi, görkəmli şairin ömür yoluna nəzər salındı, aktyorların ifasında əsərlərdən parçalar səsləndi.

Tədbirdə fəlsəfə elmləri doktoru, yazıçı-publisist Salatın Əhmədli, yazıçı-publisist Atababa İsmayıloğlu, Milli Azərbaycan Ədəbiyyatı Muzeyinin elmi işçisi Tomris Babanlı, Bakı Şəhər Mərkəzləşdirilmiş Kitabxana Sistemlərinin direktorları, kitabxanaların əməkdaşları və oxucular iştirak edirdilər. İştirakçılar Hüseyn Cavidin əsərlərindən ibarət kitab sərgisi və həyatını əks etdirən foto stendlə də tanış oldular.

Lalə Azəri

Mədəniyyət.- 2012.- 10 oktyabr.- S. 6.