Rafiq Qasım oğlu Atakişiyev

Azərbaycan mədəniyyətinə ağır itki üz vermişdir. Teatr sənətinin tanınmış nümayəndəsi, Əməkdar mədəniyyət işçisi Rafiq Qasım oğlu Atakişiyev 2012-ci il sentyabrın 27-də 72 yaşında vəfat etmişdir.

Gəncə Dövlət Dram Teatrının quruluşçu rejissoru Rafiq Atakişiyev 1940-cı il mayın 20-də Füzuli rayonunda anadan olmuşdur. 1968-ci ildə Azərbaycan Dövlət İncəsənət İnstitutunun rejissorluq fakültəsini bitirmişdir.

1968-ci ildən Ağdam Dram Teatrında əmək fəaliyyətinə başlayan R.Atakişiyev teatrın yaradıcılarından biri olmuş və uzun illər bu teatrda baş rejissor vəzifəsində çalışmışdır. 1976-1978-ci illərdə Moskva şəhəri Mayakovski adına Akademik Dram Teatrında rejissor-stajor işləmişdir.

1978-ci ildən 1989-cu ilə qədər Musiqili Komediya Teatrında quruluşçu rejissor işlədiyi müddətdə R.Atakişiyev O.Kazımovun «Qızıl toy», E.Sabitoğlunun «Nəğməli Könül», Offenbaxın «Fransız qonaq» və s. əsərlərə quruluş vermişdir.

1978-90-cı illərdə teatrla yanaşı, Mədəniyyət və İncəsənət Universitetində baş müəllim, dosent kimi pedaqoji fəaliyyət ilə məşğul olmuşdur. T.Kazımovun yaradıcılığına həsr olunmuş «Rejissor teatra gəlir» adlı monoqrafiyanın, teatr sənətçilərinin yaradıcılığından bəhs edən bir çox kitabların müəllifidir.

R.Atakişiyev 1990-cı ildən 1998-ci ilədək Akademik Milli Dram Teatrında sərəncamçı direktor vəzifəsində işləmişdir.

1999-2008-ci illərdə Gəncə Dövlət Dram Teatrının bədii rəhbər və direktoru vəzifələrində çalışmışdır. Burada sənətçinin təşəbbüsü və rəhbərliyi ilə gənc aktyorların yetişdirilməsi üçün ictimai əsaslarla aktyor studiyası təşkil olunmuşdur.

Son illər R.Atakişiyev C.Cabbarlının «Oqtay Eloğlu», İ.Əfəndiyevin «Mahnı dağlarda qaldı», Bukovçanın «Qana qan», H.Cavidin «Afət» tamaşalarını hazırlamışdır. O, Azərbaycan Teatr Xadimləri İttifaqı idarə heyətinin üzvü, «Qızıl Dərviş» mükafatı laureatı idi. 2005-ci ildə “Əməkdar mədəniyyət işçisi” fəxri adına layiq görülmüşdür. O, ömrünün 44 ilini teatr sənətinə həsr etmişdir.

İstedadlı təşkilatçı, gözəl insan Rafiq Atakişiyevin işıqlı xatirəsi onun dostlarının, yaradıcı ziyalıların qəlbində qalacaqdır.

Allah rəhmət eləsin.

Mədəniyyət və Turizm Nazirliyi

Teatr Xadimləri İttifaqı

Gəncə Dövlət Dram Teatrı

Mədəniyyət.- 2012.- 10 oktyabr.- S. 13.