Frankfurt sərgisində kitablarımıza böyük maraq var

Oktyabrın 10-da Almaniyanın Frankfurt şəhərində 63-cü Beynəlxalq kitab sərgisi açılıb. Oktyabrın 14-dək davam edəcək sərgidə Azərbaycanın çap-poliqrafiya məhsulları da nümayiş olunur. Tədbirdə ölkəmizi Heydər Əliyev Fondunun, Mədəniyyət və Turizm Nazirliyinin, M.F.Axundzadə adına Azərbaycan Milli Kitabxanasının məsul əməkdaşlarından ibarət nümayəndə heyəti təmsil edir.

Ölkəmizin zəngin mədəniyyətinin, inkişaf edən nəşriyyat-poliqrafiya sahəsinin, kitab sənətinin təmsil və təbliğ olunması məqsədilə Frankfurtun “Messe” sərgi şəhərciyində 40 kvadratmetr sahədə gözəl dizayna malik “Azərbaycan” stendi qurulub. Stenddə Heydər Əliyev Fondu və Mədəniyyət və Turizm Nazirliyi tərəfindən nəşr olunan, Milli Kitabxananın fondlarından gətirilən 350 adda nəfis kitab və 700 nəşr məhsulu yer alıb. Sərginin ilk günündə stendimiz tamaşaçıların diqqətini cəlb edib və xeyli ziyarətçi toplayıb.

Oktyabrın 13-də sərgi çərçivəsində Azərbaycan nümayəndə heyətinin və Almaniyanın Mainz Universitetinin bir sıra alimlərinin iştirakıyla dahi Azərbaycan şairi Nizami Gəncəvinin 870 illik yubileyi ilə əlaqədar tədbirin keçirilməsi də nəzərdə tutulub.

Frankfurt Beynəlxalq kitab sərgisi dünyanın ən böyük nəşr məhsulları yarmarkasıdır. Ənənəvi olaraq hər il oktyabrın ortalarında keçirilən yarmarkada dünyanın bütün nəşriyyatları və multimedia şirkətlərinin nümayəndələri bir araya gəlirlər. Yarmarkada dünyanın 110 ölkəsinin 7500-dən çox stendi qurulur və 286 mindən çox qonaq iştirak edir.

Bu sərginin 500 ildən çox tarixi ənənəsi var. Yohannes Quttenberq Frankfurt-Maynz yaxınlığında kitab çapını ixtira etdikdən sonra ilk kitab yarmarkası yerli satıcılar tərəfindən keçirilib. XVII əsrin sonunda Avropanın ən əhəmiyyətli kitab yarmarkasına çevrilib. İntibah dövründə siyasi və mədəni inkişafın nəticəsi olaraq Leypsiq kitab yarmarkası onu kölgədə qoyub.

Bu ənənələr illər sonra davam etdirilib, 1949-cu ildə Müqəddəs Paul Kilsəsində ilk kitab yarmarkası yenidən keçirilib və o vaxtdan Frankfurt kitab yarmarkası yenidən özünün qabaqcıl mövqeyini qazanıb.

Ölkəmiz Frankfurt kitab sərgisində beşinci dəfədir ki, təmsil olunur.

Mədəniyyət.- 2012.- 12 oktyabr.- S. 3.