İnsan amili, iqtisadi inkişaf və sosial problemlərin həlli

Söhbət Göygöl rayonunda bu sahədə toplanmış müsbət təcrübədən gedir

Göygöl Rayon İcra Hakimiyyətinin başçısı Arif Seyidovun növbəti səyyar qəbulunun Çaykənd kəndində keçirilməsi heç də təsadüfi deyildi. Havalar getdikcə sərinləşir, payızın soyuq nəfəsi hiss olunur. Dağlıq və dağətəyi bölgələrdə isə soyuq küləklər daha tez-tez əsir. Deməli, dağ kəndlərinin qayğılı, narahat gecələri başlanır. Elə ona görə də icra başçısının növbəti səyyar qəbulu 2314 nəfərin yaşadığı Çaykənddə keçirildi. Rayon icra hakimiyyətinin başçısı üçün, hər şeydən əvvəl, bunları dəqiqləşdirmək lazım idi: sosial problemlərin həlli nə vəziyyətdədir, keçən səyyar qəbulda irəli sürülən təklif, arzu və qeydlər necə yerinə yetirilmişdir, həllini gözləyən məsələlər varmı?

Əslində, Çaykənddə keçirilən səyyar qəbulu, bir növ, hesabat da adlandırmaq olardı. Axı ötən qəbulda həllini gözləyən bir sıra vacib sosial məsələlər qaldırılmış, maraqlı arzu və təkliflər irəli sürülmüşdü. İndi kənd sakinləri, əlbəttə, onların icra vəziyyəti barədə danışacaqdılar. Belə də oldu. İcra hakimiyyətinin başçısı isə növbəti səyyar qəbula, necə deyərlər, əliboş gəlməmişdi. Belə ki, qaldırılmış vacib sosial məsələlərin, demək olar ki, hamısı öz müsbət həllini tapmışdı.

Hamının deməyə sözü vardı. Ona görə də zalda quraşdırılmış mikrofonların önündə uzun növbə yaranmışdı. İlk dəfə söz alan isə Məzahir Alıyev oldu:

- Ötən səyyar qəbul da elə burada keçirildi. Qaldırılan məsələlər, irəli sürülən təklif və qeydlər də indiki kimi yadımdadır. Sözün düzü, şəxsən mən düşünürdüm ki, bu qədər məsələləri qısa müddət ərzində həll etmək çətin olacaq. Yeri gəlmişkən, həmin məsələləri bir daha xatırlatmaq istəyirəm: Çaykəndin arxasından keçən Kürəkçayın üzərindəki qəzalı vəziyyətdə olan körpünün təmiri, kənd xəstəxanasına təcili yardım maşınının verilməsi, daxili yollara çınqıl örtük döşənməsi və s. Bəli, bu məsələlər uzun illər idi ki, öz həllini gözləyirdi, yerli sakinlərin haqlı narazılığına və giley-güzarına səbəb olurdu. Bəs indi vəziyyət necədir? Fərəhlə bildirmək istəyirəm ki, bizi narahat edən həmin məsələlər artıq öz müsbət həllini tapıb. Ona görə də fürsətdən istifadə edərək kənd sakinləri adından sizə dərin təşəkkürümüzü bildirmək istəyirəm.

Nurəddin Səfərov: - Sözün düzü, şəxsən mən inanmırdım ki, qaldırdığımız məsələlər qısa müddətdə öz həllini tapa bilər. Ona görə ki, illərlə bu problemlər həll olunmamış qalırdı. Ancaq gördüyünüz kimi, yolumuz da düzəlib, körpümüz də. Bütün bunlara görə sizə "çox sağ olun" deyirik. Bununla belə, sizin gəlişinizdən, burada keçirilən səyyar qəbuldan istifadə edərək bəzi məsələlərə toxunmaq istəyirəm.

Bildiyiniz kimi, bizim dağlarda qış tez düşür. Artıq soyuq havalar başlanıb. May ayına qədər bu dağlardan qar əskik olmur. Dediyimiz odur ki, qışa vaxtında və hərtərəfli hazırlıq görülməsi çox vacibdir. Düzdür, elektrik enerjisi, içməli su sarıdan heç bir çətinliyimiz yoxdur. Ancaq təbii qazla bağlı vəziyyət heç də yaxşı deyil. Məsələ burasındadır ki, kəndin bir hissəsinə qaz verilir, qalan hissəsinə isə xətt çəkilməyib. Əlac qalır meşələrə. Orda da ciddi qadağalar qoyulub. Bəs, elə isə bu camaat qışda mənzillərini necə qızdırsınlar? Nəzərə almaq lazımdır ki, vəziyyətin bu cür davam etməsi yerdə qalan kənd sakinlərinin haqlı narazılığına, həm də meşələrin qırılmasına səbəb olur. Deməli, nə qədər ki, gec deyil bu vacib sosial məsələnin həllinə başlamaq lazımdır.

Azər Hüseynov: - Düzdür, son vaxtlar kəndə gələn, eləcə də kəndarası yollar cari təmir edilib, bəzi yerlərə çınqıl döşənib. Ancaq, nəzərə almaq lazımdır ki, bizim yollar dağ yollarıdır. Qış ayları, sərt havalar, dağ selləri yollarda tez-tez problemlər yaradır. Ona görə də burada təmir-bərpa işləri ilboyu, özü də keyfiyyətlə aparılmalıdır.

Əfqan Nəcəfov: - Bizim kənd rayonun ən böyük yaşayış məntəqələrindən biridir. Hazırda burada yüzlərlə əmək qabiliyyətli gənc yaşayır. Ancaq, təəssüf ki, onların müvafiq iş yerləri ilə təmin edilməsi istənilən səviyyədə deyildir. Hamının ali təhsil almağa imkanı yoxdur. Bəs bu gənclər hara getsinlər, özlərinə harda iş tapsınlar? Bu barədə ciddi düşünmək lazımdır. Yəqin, indi deyəcəksiniz ki, hər bir ailənin müvafiq torpaq sahəsi var, qoy orda işləsinlər, məhsul yetişdirsinlər və s. Bu, ilk baxışda belədir, ancaq əksər ailələrdə 3-4 cavan oğlan var. Bunların hamısı torpaqda işləyə bilməz ki?..

Vəziyyətdən çıxış yolu kimi təklif edirəm ki, kənddə rayonun iri emal müəssisələrinin filialları açılsın. Bu, həm bizim, həm də onlar üçün çox əlverişli olar. Məsələn, meşələrimiz cır meyvələrlə zəngindir. Əgər burada belə bir tədarük və emal sexi açılarsa, çox mənfəətli olar. Digər sahələrdə də kifayət qədər imkan və ehtiyat mənbələri var. Əsas məsələ, necə deyərlər, qabağa düşmək, təşəbbüs göstərmək, konkret addım atmaqdan ibarətdir.

Mikayıl Rzayev: - Mənim sözüm kəndimizdəki mədəniyyət evi, klub və kitabxana barədədir. Onların hər birinin öz münasib binası var, buna, necə deylərlər, sözümüz yoxdur. Ancaq, gəlin görək, o binalar müasir tələblərə cavab verirmi? Axırıncı dəfə nə vaxt təmir olunub? Yaxud orada mədəni-kütləvi tədbirlər keçirmək üçün imkan və şərait varmı? Bir az bundan əvvəl burada gənclərdən danışdılar. Əslində, onların boş vaxtlarının səmərəli keçməsi mədəniyyət evi, klub və kitabxanalardan çox asılıdır. Açıq etiraf edək ki, bizdə bu cəhətdən vəziyyət heç də yaxşı deyil. Bu məsələlərə diqqət artırılsa çox yaxşı olar...

...Çıxışlar, təklif və qeydlər davam edir. Hamısı da həllini gözləyən vacib məsələlər, ciddi sosial qayğılar, gündəlik işlərdir. Əlbəttə, onların hamısı Göygöl Rayon İcra Hakimiyyətinin müvafiq şöbələri tərəfindən dəqiq qeyd edilir, ümumiləşdirilir, icra müddəti və vəziyyəti təhlil olunur.

Rayon icra hakimiyyətinin başçısı Arif Seyidov səyyar qəbulu yekunlaşdırdı, ötən qəbuldan sonra görülmüş işlər barədə məlumat verdi, irəli sürülən təklif və qeydlərə öz münasibətini bildirdi:

- Ən əvvəl dediyiniz xoş sözlərə görə təşəkkürümü bildirirəm. Bu sözlər, ilk növbədə, respublika Prezidenti İlham Əliyevin ünvanınadır. Ona görə ki, bütün bu işlər ölkə başçısının gündəlik diqqət və qayğısı nəticəsində görülüb, başa çatdırılmışdır. Respublikamızın bütün bölgələri kimi, Göygöl rayonu da son illər əsl inkişaf və yüksəliş yolu keçmiş, genişmiqyaslı tikinti-abadlıq və quruculuq işləri aparılmışdır. O da fərəhlidir ki, başlanmış tikinti-abadlıq işləri bu gün də eyni sürət və keyfiyyətlə davam etdirilir.

Digər tərəfdən, sizlə görüşmək, arzu, təklif və qeydlərinizlə bilavasitə tanış olmaq bizim vəzifəmizdir. Biz bundan sonra da yerlərdə sakinlərlə belə görüş və söhbətləri, səyyar qəbulları davam etdirəcəyik. İndi gəlin, irəli sürdüyümüz təklif və qeydlərimizi təhlil edək. Sözsüz ki, rayon icra hakimiyyətində həmin məsələlər qruplaşdırılacaq, sistemə salınacaq, icra müddəti və bu işə məsul olan şəxslər müəyyənləşdiriləcəkdir. İndiki halda isə deyək ki, qaldırdığımız məsələlərdə haqlısınız və güman edirəm ki, yaxın vaxtlarda öz müsbət həllini tapacaqdır.

Göygöl Rayon İcra Hakimiyyətinin başçısı Arif Seyidovun Çaykənd kəndində keçirilən səyyar qəbulu, bax belə bir işgüzar şəraitdə - açıq, səmimi söhbət və dialoqla, yüksək əhval-ruhiyyə ilə başa çatdı. Əsas cəhət odur ki, kənd sakinləri burada qaldırılan vacib sosial məsələlərin həllinə dərin inam və ümid bəsləyirdilər.

Ümumiyyətlə, deyək ki, yerlərdə keçirilən səyyar qəbullar, görüş və söhbətlər Göygöl Rayon İcra Hakimiyyətinin iş üslub və metodlarında, təşkilat-idarəetmə məsələlərində xüsusi yer tutur. İnsan amili, əhalinin vacib sosial ehtiyaclarının daha etibarlı təminatı sahəsində də burada ardıcıl, sistemli iş qurulmuş, konkret vəzifələr müəyyən olunmuş, möhkəm icra intizamı yaradılmışdır. Rayon icra hakimiyyətində bütün sahələrdə olduğu kimi, ərizə və şikayətlərə baxılması, vətəndaşların qəbulu, yerlərdə keçirilən görüş və söhbətlər istiqamətində də geniş tədbirlər planı təsdiq edilmişdir. Əsas diqqət ona yönəldilmişdir ki, əhalini narahat edən vacib məsələlər, ciddi sosial ehtiyaclar yerindəcə həll olunsun, təkrar şikayətlərə yol verilməsin.

Əlbəttə, qarşıya çıxan bütün problemləri heç də həmişə daxili imkanlar hesabına həll etmək mümkün olmur. Bu zaman respublika təşkilatlarının, nazirlik, komitə və şirkət rəhbərlərinin konkret köməyinə, əməli yardımına ehtiyac duyulur. Hər yerdə olduğu kimi, burada da rayon icra hakimiyyəti başçısının konkret qəbul günü var və həmin vaxt vətəndaşların qəbulu təşkil olunur. Bundan başqa, icra hakimiyyətinin, yuxarıda da göstərdiyimiz kimi, yerlərdə də səyyar qəbulları keçirilir. Ancaq son vaxtlar rayonda məhz bu məsələdə bir qədər fərqli yanaşma tətbiq olunur. Toplanmış təcrübə göstərir ki, bu, müsbət nəticələrini verməkdədir.

Məsələn, rayon icra hakimiyyətinin başçısı yolunu heç bir hazırlıq görülmədən və heç kimin xəbəri olmadan hansısa kəndə, kollektivə sala bilər. Qeyri-rəsmi şəraitdə keçən görüş və söhbətlərdə adamlar onları düşündürən məsəllər barədə ürəklə, çəkinmədən söhbət açırlar. Səmimi, yoldaşcasına aparılan fikir mübadiləsi çox şeyi aydınlaşdırır. Qarşıda duran vəzifələrin həllinə belə kompleks münasibət, insan amili, onun vacib sosial ehtiyaclarının dolğun yerinə yetirilməsi isə öz növbəsində iqtisadi yüksəlişə, tikinti-abadlıq və quruculuq işlərinin sürətləndirilməsinə, sosial məsələlərin uğurla həllinə səbəb olmuşdur.

Yeri gəlmişkən, bəzi xarakterik fakt və rəqəmlərə diqqət yetirin. 2012-ci ilin ötən ayları ərzində Göygöl rayonunda sosial obyektlərin tikilməsi, abadlıq-quruculuq işlərinin aparılması, uzun illər yığılıb qalmış problemlərin aradan qaldırılması istiqamətində həyata keçirilən tədbirlər davam etdirilmiş, iqtisadiyyatın dinamik inkişafı təmin olunmuşdur.

Ötən ilin müvafiq dövrü ilə müqayisədə iqtisadiyyatın əsas sahələrində istehsal olunmuş məhsul və xidmətlərin ümumi həcmi 7821,4 min manat artaraq 57023,2 min manata çatmışdır. Rayon üzrə adambaşına 959,9 manat dəyərində, yaxud əvvəlki ilin müvafiq dövrü ilə müqayisədə 14,8 faiz çox məhsul istehsal edilmişdir. Ötən ilin müvafiq dövrü ilə müqayisədə 1652,9 min manat çox olmaqla 15907,1 min manat dəyərində kənd təsərrüfatı məhsulları istehsal edilmişdir. Bunun da 99,6 faizi qeyri-dövlət sektorunun payına düşür. Müqayisə olunan dövrdə süd istehsalı 901,4 ton, ət istehsalı, 81,8 ton, yun istehsalı 4,4 ton, yumurta istehsalı 22300 ədəd artmışdır. Sahibkarlığın inkişafına yaradılmış münbit şəraitin nəticəsi olaraq hüquqi şəxslərin sayı 449-a çatmışdır. Sahibkarlığa Kömək Milli Fondu tərəfindən 35 sahibkara 602 min manat dəyərində güzəştli kredit verilmişdir.

Göründüyü kimi, Göygöl rayonu öz inkişafının yeni mərhələsinə qədəm qoymuşdur. Rayon ziyalıları, ağsaqqalları, gənclər, geniş ictimaiyyət bu hərtərəfli inkişaf və yüksəliş, gündəlik diqqət və qayğı üçün, ilk növbədə, ölkə Prezidenti İlham Əliyevə minnətdarlıqlarını bildirdilər.

Ziyədddin SULTANOV

Xalq qəzeti.- 2012.- 14 oktyabr.- S. 6.