Ankarada maestro Niyazinin yubileyinə həsr edilmiş konsert

Ankara Opera və Balet Teatrında TÜRKSOY-un təşkilatçılığı ilə görkəmli Azərbaycan bəstəkarı və dirijoru Niyazinin 100 illik yubileyinə həsr olunmuş konsert təqdim edilib.

Konsertdən əvvəl çıxış edən Türkiyə Prezidenti Administrasiyasının Simfonik Orkestrinin rəhbəri, Dövlət Opera və Balet Teatrının baş direktoru Rengin Gökmen maestro Niyazinin dünya şöhrətli bəstəkar və dirijor kimi yorulmaz fəaliyyətindən danışıb, onun yaradıcılığının bütün türk dünyasının mənəvi sərvəti olduğunu deyib. Niyazi 1973-cü ildə I İstanbul Musiqi Festivalında Əhməd Adnan Sayqunun “Koroğlu” operasının premyerasını, sonrakı illər Ankara və İstanbul opera və balet teatrlarının səhnələrində müxtəlif operalar və “Yunus Əmrə oratoriyası”nı ifa edən orkestrləri idarə edib.

Azərbaycanın Türkiyədəki səfiri Faiq Bağırov və TÜRKSOY-un baş katibi Düsen Kaseinov maestronun Azərbaycan və dünya musiqi xəzinəsinə verdiyi qiymətli töhfələrdən söz açıblar.

Sonra Xalq artisti Rauf Abdullayevin dirijorluğu ilə Ankara Dövlət Simfonik Orkestri və solistlər maestro Niyazinin “Rast” simfonik muğamı və “Arzu” romansını, C.Puççininin “Toska” operasından Cavaradossinin ariyasını, C.Verdinin “Aida” operasından Aidanın ariyasını, P.İ.Çaykovskinin “Skripka üçün konsert”ini ifa ediblər.

Mədəniyyət.- 2012.- 24 oktyabr.- S. 4.