Qarabağlı
uşaqların çəkdikləri fotoşəkillər
Budapeştdə sərgilənib
Budapeştdə Azərbaycanın Dağlıq
Qarabağ bölgəsindən olan məcburi
köçkün uşaqların çəkdikləri
fotoşəkillərdən ibarət sərgi keçirilib.
Azərbaycanın
Macarıstandakı səfirliyindən verilən məlumata
görə, sərgi Macar Könüllülər Fondu tərəfindən
4 ölkədən 8 könüllünün iştirakı ilə
həyata keçirilən layihənin yekun tədbiri olub.
Macarıstan, Fransa, Hollandiya və
Polşadan olan könüllülər Azərbaycana gəlib,
qaçqın düşərgələrində məskunlaşan
uşaqlara fotoaparatlar paylayaraq şəkillərin çəkilməsini,
həmçinin onların “Sənin arzun nədir?”
mövzusunda inşa yazmalarını təşkil edib. Bu
inşalar da həmin sərgidə Azərbaycan, ingilis və
macar dillərində nümayiş etdirilib. SOS Uşaq Kəndlərinin
dəstəyi ilə həyata keçirilən layihənin əsas
məqsədi azərbaycanlı qaçqın və məcburi
köçkünlərin həyatı və istəklərinə
uşaqların gözü ilə nümayiş etdirməkdir.
Tədbirdə məcburi
köçkün ailəsindən olan 11 yaşlı
Elgünün vətənpərvərlik mövzusunda
yazdığı inşa macar dilində
iştirakçılar üçün oxunub.
Mədəniyyət.-
2012.- 18 yanvar.- S. 3.