Qan yaddaşımız
Daşkənddə
Azərbaycanlıların Soyqırımı Günü ilə
bağlı tədbir keçirilib
Azərbaycan Respublikasının
Özbəkistandakı səfirliyi bu ölkədəki Heydər
Əliyev adına Azərbaycan Mədəniyyət Mərkəzi
ilə birgə 31 mart - Azərbaycanlıların
Soyqırımı Günü ilə bağlı mərasim
keçirib.
Tədbirdə səfirliyin əməkdaşları,
Azərbaycan diasporunun üzvləri, jurnalistlər iştirak
ediblər. Mərkəzin foyesində 1918-ci ilin mart hadisələrini
əks etdirən fotoşəkillər, xalqımızın məruz
qaldığı soyqırımı ilə bağlı Azərbaycan,
rus və ingilis dillərində tərtib edilmiş stendlər,
Ermənistan-Azərbaycan, Dağlıq Qarabağ
münaqişəsinə dair kitablar və məlumat nəşrləri
nümayiş etdirilib.
Heydər Əliyev adına Azərbaycan
Mədəniyyət Mərkəzinin direktoru Samir Abbasov azərbaycanlıların
soyqırımı haqqında ətraflı məlumat verib.
Bildirilib ki, erməni daşnakları 1918-ci ilin mart-aprel
aylarında Bakı, Quba, Şamaxı, Lənkəran,
Naxçıvan, Hacıqabul, Salyan, Zəngəzur və digər
bölgələrimizdə yüzlərlə kənd və qəsəbələrimizi
yerlə yeksan edib, minlərlə dinc sakini məhz azərbaycanlı
olduğuna görə işgəncələrlə qətlə
yetiriblər. Stepan Şaumyanın rəhbərliyi ilə 30
min dinc sakin - qoca, qadın, uşaq qəddarlıqla
öldürülüb. Bakıdakı Təzəpir məscidi,
İsmailiyyə binası (indiki AMEA-nın rəyasət heyəti)
və digər abidələrimiz yandırılıb. Qubada
122, Dağlıq Qarabağda 150, Zəngəzurda 115, İrəvan
quberniyasında 211 kənddə dinc insanlar məhv edilib.
Sonralar Qubada aşkar olunan kütləvi məzarlıq məhz
o qanlı günlərin nişanəsidir.
Azərbaycanın Özbəkistandakı
səfiri Hüseyn Quliyev qan yaddaşımızın bu səhifələrinin
heç vaxt unudulmayacağını vurğulayıb,
diasporumuzun üzvlərini tarixi həqiqətlərin
yayılmasında, səfirliyimizin keçirdiyi tədbirlərdə
fəal olmağa səsləyib.
Sonda "Bakı
soyqırımı" sənədli filmi nümayiş
etdirilib.
Mədəniyyət.- 2013.- 3 aprel.-
S. 7.