“Milli irs mükafatı” təsis edilib

Ölkəmizin mədəni irsinin tədqiqi, mühafizəsi və təbliği sahəsində görülən işləri təşviq etmək məqsədilə Mədəniyyət və Turizm Nazirliyinin "Milli irs mükafatı" təsis edilmişdir.

Mükafatın təsis edilməsində məqsəd Azərbaycanın mədəni irsinin inkişafı naminə elmi tədqiqat və araşdırmaların aparılması, tarix və mədəniyyət abidələrinin mühafizəsində qabaqcıl standartların tətbiqi, daşınmaz tarix və mədəniyyət abidələrinin bərpa və konservasiyası, təmir-bərpa işlərinin müasir texnologiyalar əsasında layihələndirilməsi, mədəni irsimizin tanıdılması və təbliği, gənclər arasında milli memarlıq və bərpaçılıq sənətinin təşviqi, mədəni irsin qorunması sahəsində ixtisaslı kadrların hazırlanması üzrə əldə olunmuş nailiyyətlərin qiymətləndirilməsi və bu barədə geniş ictimaiyyətin məlumatlandırılmasından ibarətdir.

Mükafat mədəniyyət və turizm nazirinin əmri ilə verilir və hər il 18 Aprel - Beynəlxalq Abidələr və Tarixi Yerlər Günündə keçirilən təntənəli mərasimdə qaliblərə təqdim olunur. Xüsusi hallarda mükafat digər əlamətdar hadisə və günlərdə də təqdim edilə bilər.

Mükafat memarlıq, arxeologiya və etnoqrafiya, mədəni turizm, tarix və mədəniyyət abidələrinin bərpası, mədəni irsin tədqiqi, təbliği və mühafizəsi istiqamətləri üzrə aşağıdakı nominasiyalarda verilir:

• Azərbaycan irsinin tədqiqində xidmətlərinə görə;

• Azərbaycan mədəni irs abidələrinin mühafizəsi, bərpası və istifadəsində xidmətlərinə görə;

• Azərbaycan irsinin təbliğində xidmətlərinə görə;

Mədəniyyət və Turizm Nazirliyinin əmrinə əsasən nominasiyaların sayı artırıla və azaldıla, adları dəyişdirilə bilər. Bir nominasiya üzrə mükafatlandırılacaq kollektivlərin və yaxud fərdlərin sayına məhdudiyyət qoyulmur. Mükafat Azərbaycan Respublikası vətəndaşlarına, əcnəbilərə və vətəndaşlığı olmayan şəxslərə və yaxud kollektiv birliklərə verilir.

Mədəniyyət və Turizm Nazirliyinin “Milli irs mükafatı"na layiq görülən şəxslərə mükafatın simvolu (heykəlciyi) və diplom təqdim olunur.

Mədəniyyət.- 2013.- 17 aprel.- S. 4.