Ulu öndərin yubileyinə həsr olunmuş diskin təqdimatı

İyulun 31-də Azərbaycan Tələbə Gənclər Təşkilatları İttifaqının ofisində ulu öndər Heydər Əliyevin 90 illik yubileyinə həsr olunmuş “Buta” diskinin təqdimatı keçirilib. Disk Üzeyir Hacıbəyli adına Bakı Musiqi Akademiyası, Tələbə Gənclər Təşkilatının təşəbbüsü və Azərbaycan Respublikasının Prezidenti yanında Gənclər Fondunun maliyyə dəstəyi ilə ərsəyə gəlib.

Tədbirdə bildirilib ki, layihənin əsas məqsədi Azərbaycan klassik musiqisinin gənc ifaçılarına dəstək göstərmək, onların vasitəsilə ölkəmizdən kənarda musiqimizi təbliğ etməkdir. “Buta” diskində BMA-nın tələbələrinin ifasında Azərbaycan klassik musiqisinin inciləri toplanıb. Musiqilər arasında Üzeyir Hacıbəylinin, Qara Qarayevin, Cahangir Cahangirovun, Tofiq Quliyevin, Niyazinin, Emin Sabitoğlunun və digər görkəmli bəstəkarlarımızın əsərləri, həmçinin “Getdi yar” xalq mahnısı yer alıb. On bir musiqinin yer aldığı disk 1000 nüsxə tirajla buraxılıb.

Mədəniyyət.- 2013.- 2 avqust.- S. 9.