“Mən Azərbaycanlıyam”

Milli-mədəni irsimizin təbliğinə həsr olunan müsabiqənin növbəti qalibəri təltif edilib

Avqustun 6-da Rabitə və İnformasiya Texnologiyaları Nazirliyində “Mən Azərbaycanlıyam” online bilik yarışmasının iyul ayı üzrə qalibləri mükafatlandırılıb.

İyul ayında yarışma iştirakçıları arasında 3 nəfər qalib seçilib. Birinci yeri tutan Elnur Məmmədzadə “İphone” mobil telefonuna və mini “İphad” planşetinə, 2-ci yeri tutan Vüsal İsgəndərov “İphone” mobil telefonuna, 3-cü yeri tutan Ceyhun Cariyev isə mini “İphad” planşetinə sahib olub.

Tədbirdə qeyd olunub ki, iki ay ərzində yarışmaya qoşulanların sayı 30 minə çatıb. Bildirilib ki, yarışma dekabrın 1-dək davam edəcək və hər 10 gündən bir qaliblərin mükafatlandırma mərasimi, dekabrın ilk həftəsi isə superfinal keçiriləcək.

“Mən Azərbaycanlıyam” online bilik yarışması ümummilli lider Heydər Əliyevin anadan olmasının 90 illiyinə həsr olunmuş və “İnformasiya-kommunikasiya texnologiyaları ili” çərçivəsində reallaşdırılır. Yarışmanın məqsədi milli-mədəni irsimizin təbliği, bu sahədə marağın və biliklərin artırılması, vətənpərvərlik hisslərinin yüksəldilməsidir. Yarışmaya oyunun rəsmi saytı (www.azerbaycanliyam.az) vasitəsilə qoşulmaq olar.

Mədəniyyət.- 2013.- 7 avqust.- S. 3.