Liviya qəzetində Əlimərdan bəy Topçubaşov haqqında məqalə dərc edilib

Azərbaycan Respublikasının Prezidenti İlham Əliyevin “Əlimərdan bəy Topçubaşovun 150 illik yubileyinin keçirilməsi haqqında” 25 fevral 2013-cü il tarixli sərəncamına uyğun olaraq Xarici İşlər Nazirliyinin hazırladığı tədbirlər planına əsasən ölkəmizin Liviyadakı səfirliyi bu ölkənin aparıcı kütləvi informasiya vasitələrinin nümayəndələri ilə bir sıra görüşlər keçirib.

Səfirlikdən bildiriblər ki, görüşlərdə Azərbaycan Xalq Cümhuriyyəti parlamentinin ilk sədri Əlimərdan bəy Topçubaşovun şərəfli həyat yolu və ictimai-siyasi fəaliyyəti haqqında ətraflı məlumat verilib.

Keçirilən görüşlərin nəticəsi olaraq geniş oxucu kütləsinə malik olan “Əl-Ğad” qəzetində “Əlimərdan bəy Topçubaşov” sərlövhəli məqalə dərc edilib.

Məqalədə görkəmli ictimai-siyasi xadimin keçdiyi həyat yolunda qarşılaşdığı maneələr və xeyriyyəçilik fəaliyyəti barədə məlumatlar oxucuların diqqətinə çatdırılıb. Qeyd edilib ki, Əlimərdan bəy Topçubaşov çar Rusiyasında müsəlman-türk hərəkatının liderlərindən və ideoloqlarından biri olub. Türk xalqlarının milli özünüdərkinin təşəkkül tapmasında, onların birliyinin möhkəmlənməsində böyük rol oynayan Əlimərdan bəy Topçubaşovun Azərbaycan dilində dərc edilən “Həyat” qəzetinin nəşrinə icazə verilməsində böyük xidməti olub.

Yazıda həmçinin həmin dövrdə Əlimərdan bəy Topçubaşovun öz xalqının maraqlarının fəal müdafiəçisi olduğu, qarşı tərəfin təcavüzkar mahiyyətini ifşa etdiyi bildirilib. Əlimərdan bəy Topçubaşov Azərbaycan Xalq Cümhuriyyətinin təşəkkül tapması, onun dünya dövlətləri tərəfindən tanınması və diplomatik münasibətlərinin qurulmasında da böyük səylər göstərib. O, müstəqil Azərbaycanın ilk səfiri olaraq ölkəmizin diplomatik missiyasına əvvəlcə Gürcüstanda, daha sonra isə Türkiyədə rəhbərlik edib, 1918-ci ilin dekabrında parlamentin ilk rəhbəri seçilib.

Mədəniyyət.- 2013.- 23 avqust.- S. 15.